San Antonio, Texas,
U.S.A.
Lé 12 janvyi, 1974.
Moussieu l'Rédacteu,
La gâzette dé Jèrri du 22 d'novembre, 1973, tchi veint d'arriver ichîn, nouos annonce qué les Jèrriais s'en vont p't-êt' acouo pèrdre iun d'lus anciens privilèges - lé privilège dé pouver êt' dêcliathés “En d'sastre”. I' faut admett', sans doute, qué la grand parties des Jèrriais n'avaient pon l'ambition d'prendre avantage dé chutte dêcliathâtion-là, en qu'un tas mème n'étaient pon 'té capabl'yes d'explyitchi tch'est qu' ch'la veurt dithe sans aver consulté un homme d'affaithes, à mains d'aver ieux-mèmes travailli dans La Rue des Trais Pigeons. Mais commes les temps changent! Les vielles couôteumnes dispathaîssent, mème en louai, et sont rempliaichies par dé tchi nouvé, tchiquefais d'l'êtrangi. I' n'y étha pon beintôt fort dé la Couôteunme dé Nouormandie d'restant dans nouot' procédé juridique. J'mé d'mande s'i' s'en vont abandonner l'dégrèvement pour tchique aut' chose étout?
En pâlant d' La Rue des Trais Pigeons, v'la tch'i' m'fait penser qu' les pigeons ont 'té des chents ans l'tou d' La Cohue Rouoyale, dépis qu' la rue fut nommée pour trais d'ieux dans les touos vièrs temps, et qué, d'pis l'temps, ch'n'est pon êtonnant tch'i' ont multipliyé au point tch'i' y'a pâlement d'les dêtruithe, entchiéthement ou en partie, pour l's empêchi d'laîssi lus cartes d'visites avraûner l'estatue dans l'Vièr Marchi et tchaie sus la tête et l's êpaules des gens tchi s'donnent lé pliaîsi d'lus assiéthe là à joui du solé et r'garder les pâssants.
Et pâlant d'pigeons m'fait penser ès plieunmes tchi lus couvrent l'dos, et qu'un vièr diton (i' sont fanmeux, nouos vièrs ditons!) nouos dit qu' ch'est l'ouaîsé tchi n'en a qu' ieune tchi vole lé mus. N'est-i' pon r'mèrquabl'ye qué ch'est dans chutte mème Rue des Trais Pigeons qué nou l'trouve, ch't ouaîsé-là?
Ch'est auve pliaîsi qué j'félicite lé Chanoine Olney tchi veint d'célébrer san jubilé d'argent, et j'lî souhaite acouo bein d's années à continnuer san saint mînnistéthe. Mais à m'n idée ch'n'est pon correct dé li donner l'titre, comme il est mîns en Angliais dans la gâzette, dé “Douoyen Catholique dé Jèrri”. Officiellement, i' n'y a qu' un Douoyen d'Jèrri, et ch'est l' Très Révérend T. A. Goss, tch'est en mème temps - comme i' s'adonne - Récteu d'St. Hélyi. Combein d'gens ont janmais rêalisé qu' l'Églyise Catholique Romaine et les souô-disant Églyises Libres sont êgalement “Non-conformistes” en Jèrri? Ch'n'est pon qu' j'en ai contre ieux. J'en fais mention seulement pour affirmer l'privilège officiel dé l'Églyise Anglyicanne dans l'Île.
Y'a d'bouannes nouvelles dans la gâzette. Ch'est eune raide bouanne idée d'bâti eune maîson pour les anciens à St. Brélade, et j'vai qué l'Sieur John J'valyi a dêjà dgiex mille louis en main pour quémenchi. I' sont bein d'aver un St. Ouënais comme li à St. Brélade. J'pense qué l'Connêtabl'ye d'La Haye est St. Ouënais étout. I' faut féliciter les St. Bréladais pour aver l'avis dé l's aver êlus pour navidgi lus pâraisse. Et il' ont dêjà eune bouanne maîson d'èrfuge pour l's anciens à St. Aubîn où'est qu' Madanme Rive souangne san troupé commes des poulets. Ou lus est si bouanne, et i' pathaîssent si heutheux auve lyi, qu' ch'est un pliaîsi d'les visiter. Chutte maîson-là es'sa-t-alle încorpothée auve la neuve quand ou s'sa bâtie?
Eune aut' bouanne nouvelle est tch'i' iut mains d'accidents d'motos dans les routes dé Jèrri dans l'mais d'octobre. Y'en a dêjà mains ichîn en Améthique dépis qu' un tas d'gens ont obéi la d'mande du Président Nixon dé cachi à 50 milles à l'heuthe à la pliaiche dé 70 et 75 pour sauver d'la pétrole dépis qué l's Arabes né veulent pon nouos en vendre. Mais, comme j'l'avais prédit, y'a acouo un tas d'motoristes tchi continnuent à cachi à grand' vitesse, et i' pathaît qu' eune louai s'en va êt' pâssée pour la lînmiter à 55 milles à l'heuthe.
I' faut féliciter la pâraisse dé St. Hélyi pour aver êlu l'Cap'taine George Norman Simon Chent'nyi. Né v'la un moussieu tchi s'en va s'prouver à la hauteu d'sa chèrge. Un vrai type Jèrriais, courtouais et d'belle présence, et la sorte d'pèrsonne tch'i' faut pour un futur Connêtabl'ye. Quandi qu' un homme dé san calibre est prêt à ouffri ses sèrvices, la Police Honorifique dé l'Île prouvetha sa valeu.
Et i' n'faut pon qu' j'oublie d'féliciter l's autorités tchi veulent faithe eune promenade pèrpétuelle dé La Rue d'Drièthe à St. Hélyi. Quand j'tais en Jèrri l'êté pâssé, j'trouvais qué ch'tait mangnifique dé pouver marchi dans chutte rue-là sans aver à heunmer l'air empouaîsonné par l'âcrîn des tchuyaux d'êcappe des motos à chaque pas, sans pâler d'aver à êt' bostchulé par eune racachie d'touristes à r'garder les f'nêtres d'boutiques et lus lôvier sus l'pavé, et à marchi à la vitesse dé 14 milles dans 15 jours!
George d'La Forge
Viyiz étout: