Le Ménage ès Feuvres,
St. Ouën.
Lé 25 dé septembre, 1976.
Moussieu l'Rédacteu,
J'pense bein qué les Jèrriais dé m'n âge ont liu, comme mousses à l'êcole, l'histouaithe du Rouai Edouard Lé Confêsseux d'Angliétèrre et fondateur dé l'Abbaye dé Westminster à Londres. I' mouothit lé 5 dé janvyi, 1066, et fut entèrré d'dans. L' "Encyclopaedia Britannica" nouos dit qué s'n'entèrrement eut lieu l'préchain jour auprès sa mort. Mais combein tch'i' y'a d'Jèrriais tchi savent qué chu rouai-là vînt en Jèrri?
En êtudiant "La Chronologie d'Jèrri" (par l'Avocat Edmund Toulmin Nicolle et Ralph Mollet), j'ai r'mèrtchi qué vèrs l'année 1030 Robert Preunmyi, Duc dé Nouormandie, organîsit eune expédition pour chasser lé Rouai Canute d'Angliétèrre et înstaller Edouard (pus tard connu comme "Lé Confêsseux") sus l'trône à sa pliaiche. Edouard, fis d'Aethelred Deux et d'Emma, fille dé Richard, Duc dé Nouormandie, avait 'té né en Angliétèrre, mais i' s'en 'tait allé en Nouormandie auve ses pathents quand Sweyn fut r'connu comme Rouai en 1013, et y d'meuthait en 1030 quand i' s'embèrtchit auve lé Duc Robert pour l'Angliétèrre. Mais i' fûdrent quâsi naufragis par eune tèrribl'ye tempête dans La Manche et il' eûdrent à faithe vaile pour Jèrri et ménagîdrent à y'attèrrer, et il' y restîdrent eune volée. L'histouaithe est racontée par nouot' fanmeux poëte Wace, et oulle est mentionnée à la page chent dgiex-sept des "Tableaux Historiques de la Civilisation à Jersey" par John Patriarche Ahier.
Edouard Lé Confêsseux n'fut pon l'seul rouai à v'nîn en Jèrri dans les vièrs temps. Les "Tableaux Historiques" nouos dîsent qué l'fanmeux Rouai Jean, tchi fît tant pouor nouos asseûther l'indépendance dé Jèrri, y vînt lé 13 de juîn, 1205, auve tchiques navithes, et tch'il y restit pour eune volée, en attendant, vainement, les s'cours tch'i' s'attendait r'chéver d'Angliétèrre pour lî'aidgi à êprouver à r'prendre la Nouormandie continentale qué lé Rouai Philippe Auguste dé France lî'avait êrachie l'année dé d'vant. L'histouaithe nouos raconte qué, ayant arrêté en vain pour l'arrivée d'ses barons, i' s'en r'fut en Angliétèrre et r'vînt en France l'année en r'vénant et r'pâssit un p'tit d'temps en Jèrri en c'mîn. I' n'ménagit janmais à r'prendre la Nouormandie des Français, et i' mouothit dans l'Châté dé Newark en Angliétèrre lé 19 d'octobre, 1216, d'eune îndigestion, et y'en a tchi craient qué ch'tait pûtôt d'un empouaîsonnement.
Lé Rouai Henri Trais, successeur du Rouai Jean, vînt en Jèrri étout. D'après "La Chronologie d'Jèrri", i' y'attèrrit lé 2 d'mai, 1230, dévant continnuer san viage à St. Malo. Les "Tableaux Historiques" né mentionnent pon chutte visite. Ch'tait Henri Trais tchi nommit Philippe d'Aubigny, san précepteur, Gouvèrneux des Îles en 1212. d'Aubigny mouothit à Jérusalem en 1236 et fut entèrré tout près d'l'entrée d'l'Églyise du Saint Sépulcre, J'vis sa tombe quand j'visitis Jérusalem en 1951. San nom est înscrit sus une pièrre tombale tch'est à pliat d'ssus et ch'est r'mèrquabl'ye qué l'êcrituthe n'ait pon 'té êffachie par les pas des pélérîns tch'ont marchi d'ssus en entrant dans la Basilique, car ou soulait êt' en d'vant d'la grand' porte où'est tch'i' voulait êt' entèrré. Ou fut mînse un mio à côté pus tard, mais l's os du c'valyi né fûdrent pon bouogis. Il avait arrivé en Orient auve ieune des Crouaîsades en 1222 et s'en 'tait allé à Jérusalem en 1228 auve l'Empereur Frédéric Deux.
Lé Prînce Charles, pus tard Rouai Charles Deux, fut appathemment l'préchain rouai tchi visitit Jèrri. Il arrivit lé 17 d'avri, 1646, des Îles dé Scilly, et d'meuthit dans l'Châté Êlizabé et restit en Jèrri jusqu'au 25 dé juîn, quand i' s'en fut en France. I' fut procliâmé Rouai Charles Deux lé 17 dé févri, 1648/9, dans l'Vièr Marchi et r'vînt en Jèrri lé 17 dé septembre, 1649, et s'en r'fut à Bréda dans les Pays Bas lé 13 dé févri, 1650.
I' n'y'iut pon d'aut' visites d'un rouai en Jèrri pour quâsi deux chents ans (à mains qué j'mé trompe), mais lé 2 d'septembre, 1846, la Reine Victoria et l'Prînce Albert y vîndrent. Jé n'sai pon combein longtemps tch'i' fûdrent dans l'Île, mais j'ai eune idée tchi s'en r'fûdrent lé même jour. I' r'vîndrent eune deuxième fais pus tard, é 13 d'août, 1859, ch'est en tchi i' faut penser qu'lus preunmié visite les avait împressionnés.
Lé Rouai George Chînq vînt auve la Reine Marie et la Prîncesse Marie lé 12 dé juilet, 1921. Lé Rouai siégit La Cour d'Héthitage et fut présent à eune séance des Êtats. Ches visites dé nouos rouais et ducs avaient sans doute créé un précédent pour les visites des membres dé la Fanmil'ye Rouoyale dé nouos jours, car i' m'sembl'ye tch'il y sont touos v'nus dépis lé Rouai George Chînq. Ch'est un grand honneu pour Jèrri!
Viyiz étout: