Trenton,
Michigan, USA.
Lé 24 dé mar, 1979.
Moussieu l'Rédacteu,
Un diton nouos dit qu' au r'nouvé tout est bé. Eh bein, nouos y v'là, au r'nouvé, et l'temps a amendé. Ichîn, la né a dispathu dé d'dans les rues, et l'solé r'lît. Mais i' fait fraid. Les vents d'nord nouos amènent l'air du fanmeux Pôle. Pour mé, ch'est rafraîchissant auprès aver vêtchu l'hivé dans la chaleu des pays cauds. Et comme nouos l'dit un aut' vièr diton: “Changement d'pâtuthe fait les vieaux gras.” J'n'ai quand-même pon idée d'engraîssi, mais l'changement d'pâtuthe du r'nouvé m'appréche dé ma visite annuelle en Jèrri, et pour mé v'la tchi renforche chu diton qu' au r'nouvé tout est bé!
Chutte fais jé n'peux pon m'pliaindre qué j'n'en ai pon d'nouvelles, dé Jèrri, car trais gâzettes sont v'nues en même temps, les cheinnes du 4 et des 18 et 25 dé janvyi. Comme d'habitude, la preunmié chose 'tait d'èrgarder les décés, mais i' n'y'en avait qu' deux tchi m'ont frappé. Lé preunmyi 'tait l'Cap'taine Tessier-Yandell. J'n'ai pon ieu l'honneu dé l'connaître pèrsonnellement, mais j'ai ieu d'la correspondance auve li au sujet d'la Couleu d'Jèrri dévant tch'il êcrivîsse sa fanmeuse articl'ye à chu sujet dans la gâzette y'a un an. Jé n'tions pon du même avis, car il 'tait en faveur dé justifier la couleu d'a ch't heu - la crouaix d'St. Patrice - et j'sis en faveur d'adopter les trais léopards tchi sont sus l'sceau d'nouot' baillage, nouos sou, nouos dotchûments officiels et nouos timbres, mais ses lettres étaient charmantes et d'bouanne heunmeu. Un vrai moussieu, l'Cap'taine, et j'ai r'gret d'vaie san décès dans la gâzette.
En pâlant d'la Couleu d'Jèrri, j'sis ravi d'vaie qu' autchun membre né s'est pon 'couo d'menté d'am'ner l'affaithe dévant L's Etats. J'éthais pourtant aimé vaie les trais léopards au haut du mât d'vant mouothi!
Eune pèrsonne qué j'connaîssais et tch'est dans les décès est l'Sieur Philip Edward Noël, mort dans sa septantième année. J'peux dithe qué j'lé connaîssais d'vant tch'i' fûsse né! San p'pèe, Philip John Noël, travaillait au Greffe. Il 'tait lé d'mié-fréthe à Moussieu Charles William Binet, Ecrivain, et 'tait un charmant corps, un homme bein plianté et d'un caractéthe si doux tch'il 'tait appelé “Lé Gros Doux”. J'tais dans l'office à Moussieu Binet au nunmétho douze, La Rue ès Trais Pigeons. Lé Sieur Noué v'nait pâsser s'n heuthe du dîner dans l'office à san d'mié-fréthe touos les jours, et l'arrivée attendee dé s'n héthitchi 'tait l'sujet d'convèrsâtion pour tchique temps d'vant la naîssance du garçon tchi fut nommé Philip Edward à l'occâsion d'san bâptême dans la Chapelle Wesleyenne dé St. Martîn.
Dans l's annèes tchi siûtent, j'm'en fus à la dgèrre et pus tard au Cannada et en Améthique. Quand j'èrvîns en Jèrri en 1946, Philip John Noël n'était pus du rang des vivants, et l'janne Philip Edward était mathié, péthe dé fanmile et iun des miyeurs prédicateurs dé la Chapelle Wesleyenne tch'avait, dans l'entre-temps, adopté l'titre d' “Eglyise Méthodiste”! J'ai r'gret d'vaie san décès, et j'présente mes r'grets et condoléances à sa veuve et ses êfants.
Ieune des choses tchi m'a frappé dans la gâzette est l'activité des nouvieaux membres dans L's Etats. Pour un r'change, l's êlecteurs pathaissent aver êlu des membres tch'ont l'filet bein copé et tchi connaîssent pus qu' les deux mots “Pour” et “Contre” tch'ont 'té la lînmite du vocabulaithe dé la grand' partie des Députés d'campangne. Combein d'fais qu' j'ai veu dans l's êloges dé ches Députés quand il' 'taient propôsés en Assembliée Parouaîssiale Electorale pour lus gestions successives. “Qué nouot' Député n'avait pon 'té iun des grands orateurs dans L's Etats, mais tch'i' s'était tréjous distîndgi par aver voté du bouan bord”!
Ch'est encouothageant d'vaie ches nouvieaux membres pôser des tchestchions ès présidents d'conmités. V'là tchi s'en va les mett' sus l'tchi-vive et lus pids d'driéthe, et v'là tchi n'fait pon d'ma d'êpinnotchi l's affaithes dé temps en temps, prîncipalement comme i' n'y'a pon d'difféthents partis politiques à s'entre hèrtchîngni pour arriver à la miyeu conclûsion dans les débats.
J'vai qu' les gens tchi d'meuthent ès Landes à St. Ouën ont acouo à supporter l'odeu d'brulîn et la feunmée du foustra qué L's Etats sont à brûler là. Chein tchi n'm'êtonne pon est d'vaie l'atchumulâtion d'déchets dans l'portrait dans la gâzette. V'là tchi m'ramémouaithe les mots qué j'êcrivis dans ma lettre du 28 d'octobre, 1977: “Faut-i' qu' Les Landes, aut' fais un supèrbe tapis d'bruëthe - lé seul qué j'connais dans l'Ile - dêjà en dangi d'saccage à des bords par les c'mîns faits par les motos, d'veingent la maie d'foustra d'l'Ile? Landîns! Mât-ous sus vouos pids d'driéthe et séyiz en garde!”
George d'La Forge
Viyiz étout: