Lé Ménage ès Feuvres,
St. Ouen.
Lé 31 dé mai, 1980.
Moussieu l'Rédacteu,
J'mé d'mande tchiquefais combein tchi reste d'vièrs Jèrriais tchi craient acouo ès supèrstitions, enchorchell'lies et crianches du temps jadis. Ch'est seux qu'les jannes Jèrriais d'nouos jours n'en ont pon même ouï pâler d'y craithe.
Ch'est r'mèrquabl'ye qué v'la tch'est si enraichinné dans la pé des vièrs comme mé - pon nécessaithement qu'nou-s-y crait - mais qu'nou s'en r'souveint et qu'nou-s-y pense à l'occâsion. Par exempl'ye, quand j'vai des coutchieaux crouaîsis sus la tabl'ye, j'les dréche ouaithe qué j'sai ben qué v'la tchi n's'en va pon causer du brit dans la maîson ou qu'ch'est mauvaise chance. Et pis j'mé dis, en les r'dréchant, "J'sis-t-i' bête: v'la tchi n'dit rein!"
Eune aut' vielle crianche tchi pathaît aver subsisté acouo jusqu'à ches drein est tch'i' faut donner un sou ou deux en êchange pour un présent tch'a un tranchant, comme un couté ou eune brioche, ou même des chîthieaux. Même en Améthique, où'est qu'tout ch'la est censé êt' du bêtîn, j'ai veu ch'la s'faithe dans les temps d'Noué quand les présents dé d'souos l'Arbre sont distribués.
Et j'ai ouï acouo tchitch'un dithe qué j'allons aver la visite d'un homme quand un couté avait tchaie dé d'ssus la tabl'ye. Mais dans chu cas-là ch'tait eune ancienne dé nénante ans tch'en faisait la r'mèrque - et ou crait fiabliément qu'ch'est un vraie sîngne dé "l'arrivée d'un homme quand ch'est un couté, d'eune femme pour eune fourchette et d'un êfant pour eune tchulyi", et ou m'dît un jour tch'i' n'fallait pon rêmuer autcheune chose atout un couté car ch'est sîngne dé hèrtchîn à v'nîn.
Quand nou-s-y pense, ché n'tait pon drôle que l's anciens criyaient tout ch'la au sujet d'coutchieaux et d'fourchettes, car ch'n'est pon souvent qu'un jour sé pâsse sans qu'tchitch'un veinge à la porte dans la journée, et il' envîsageaient telle visite comme en étant eune preuve.
Mais crianches et couôteunmes dispathaîssent auve lé pâssage du temps. Jeudi pâssé, lé 29 du mais, par exempl'ye, mé ramémouaithe qué l'temps pâssé ch'tait l'jour d'eune fête tch'avait eune originne întérêssante. Ch'tait "Lé Jour d'La Fielle dé Tchêne" quand nou portait eune pétite branque dé fielles dé tchêne en mémouaithe du grand tchêne à Boscobel (à Donnington dans Shropshire) dans tchi qu'Charles II s'muchit et sauvit sa vie quand ses ennemîns l'poursuivaient auprès la batâle dé Worcester lé 3 d'Septembre, 1651. Des priéthes spéciales d'èrmèrcîment étaient dites dans toutes les églyises chu jour-là, et La Grand' R'veue d'La Milice Rouoyale avait lieu. Lé Docteu Frank Le Maistre, O.B.E., nouos en donne un mangnifique accompte dans les Bulletîns d'L'Assembliée d'Jèrriais.
I' nouos dit qué la célébrâtion en Jèrri eut lieu pour la dreine fais en 1807 (dans l'temps des dgèrres dé Napoléon) en présence du Général Don, mais qué les priéthes continnuîdrent à êt' faites sèrvi dans l's égylyises jusqu'en 1849. Et qué jusqu'à la dgèrre dé 1914 la grand' partie des Jèrriais portaient deux-s'trais fielles dé tchêne chu jour-là.
En liêsant l'accompte dans les Bulletîns d'L'Assembliée, j'vai tchiquechose întérêssant. Lé 6 d'juilet, 1955, lé Mâjeur F.A.L. de Gruchy, Député d'St. Ouën, dé mémouaithe respectée, proposit dans L's Etats qué la Couleu d'Jèrri sait jutchie à hauteu d'mât en d'ssus d's Etats et d'La Cour Rouoyale châque année lé 29 dé mai, disant qué ché s'sait en rêtablyissement d'la vielle couôteunme tchi célébrait la restaurâtion du Rouai Charles II. Lé Député dît qué d'pis 1660 la Couleu voltillait d'même lé 29 dé mai touos l's ans jusqu'à 1807 pour la dreine fais. I' prétendait qué ché s'sait montrer nouot' loyauté traditionnelle, et v'là tchi s'adonn'nait bein car qu'un aut' Charles était l'héthitchi à la Couronne.
Ch'tait un St. Ouennais, l'Sénateu J.J. Le Marquand, dé mémouaithe respectée étout, tchi s'gondit chutte proposition, mais i' faut dithe (à nouot' honte, à m'n idée) qué seulement sept vouaix fûdrent èrcordées en faveur, et 26 contre, et chutte bouanne idée d'un patriote Jèrriais êchouit.
V'la tchi prouve qué les Jèrriais dé y'a vîngt-chînq ans c'menchaient dêjà à pèrdre întéthêt dans l'histouaithe dé l'Île. A ch't heu? Les vrais Jèrriais dispathaîssent en même temps comme les crianches et couôteunmes du temps jadis!
George d'La Forge
Viyiz étout: