Les Pages Jèrriaises

Les d'vis du Bouan'homme George

Je n'm'en vait pas vouos dithe tch'i' l'y'a autchun pays tch'est pus bé qu'not' pétit Jèrri, - mais j'peux vouos dithe tch'i' l'y'a d'belles chose à vaie en Angliétèrre étou, - prîncipalement dans chutte contré ichîn qu'not' vièr Duc Dguilleaume de Normandie atèrri quant i' vînt bailli eune slîndgeuse ès Angliais en dgiex chent souoxante six! Et i' pathaît tch'i' 'tait erconnaîssant pour ses victouaithes, car ieune des choses tch'i' s'mîns à faithe 'tait d'bâti des grand' cathédrales pour èrmercier l'Bouan Dgieu. l'y'en a tchi veulent dithe que ch'tait pour sé glorifier li-même pus-à-co que glorifier l'Bouan Dgieu, mais quant à mé, jé n'sai pon, - l'y'a eune chose tchi n'est pas deux, - ch'est tch'il avait bouan goût, - car l's'églyises tch'i' bâtit, ou tchi fûtent c'menchies souos ses ordres, sont des monuments supèrbes à la Glouaithe du Bouan Dgieu et à la mémouaithe du fameux Duc.

Quand nou s'mête à eune distance de ches cathédrales-là, nou sé d'mande s'i' 'taient bâties pour a'c'moder eune racachie d'monde, - et il en faudrait, même aujour-d'aniet, eune racachie, pour les remplyi, - mais nannîn, mes bouan'gens, ch'n'tait pas là, l'idée, - l'idée 'tait d'bâti un bieau et grand monument à la glouaithe du Crêateur comme èrconnaissance pour le don d'la vie et d'la jouaie d'vivre et d'li chanter les louanges dédans, - ch'tait lé d'si des vièrs Architectes de crêer des monument dignes au Grand' Architecte de l'Univèrs.

J'don'nais autcheune chose pour ervaie les vièrs tch'ont bâti ches belles cathédrales-là, et les vièrs tch'ont bâti nos vielles églyises en Jèrri étou, sans doute! J'pense bein que ch'tait du monde comme nous, tch'ont vêtchu lus vie en chèrchant l'bonheur et l'contentement, et que tout tch'i' d'mandaient 'tait d'êt' laissis travailli trantchil'ment et passer la séthée auve lus femme et êfants auprés du feu. A l'entrée d'ieune des grandes églyises l'aut' jour j'vînmes deux-s-trais mots êcrits sus eune carte tchi nouos frappîtent et nous fîtent penser, l'Juge Le Feuvre et mé, à ches vièrs-là. Ch'tait tchiquechose comme chen'chîn: "Arrête un moment et r'fliéchis: chu sanctuaithe ichîn est si solonnel, et acouo si familyi! Lé temps qu'tu passe ichîn humblyiément s'en va té r'amémouaither d'un tas tch'i' t'sont înconnus mais tchi 'taient quand-même de ta race!"

Ichîn, à Winchester, i' n'y'a pas d'soin iou qu'nou va, nou vait les preuves que not' Duc Dgilleaume passit hardi d'ses preunmiéthes années ichîn l'tou aprés la Batâlle de Hastings. San Palais 'tait ichîn, et i'y'à tchiques mios d'ses vielles muthâlles tchi sont visiblyes à l'entrée d'Eglyise de St. Louothains, tch'a 'té bâtie sus l'empliaichement d'la vielle chapelle du Palais. La cathédrale fut c'menchie en dgiex chent septante-neuf, - dans san temps, et ch'est seux tch'i' prînt un grand intéthêt dans l'bâtisse.

Chose ermèrquablye, étou, est qu'nou vait les noms de tchiques Jèrriais înscrits dans la Cathédrale! L'y'à des pliaques sus les muthâlles à la mémouaithe dé pus d'un, - un nommé John Dolbel Le Couteur, tchi 'tait savant dans l'vèrre couleuthé des grandes vèrrines de la cathédrale, - un coronel Douard Le Marchand tchi 'tait fameux soudard et tchi fut tué dans l'Indes, - mais l'y'à longtemps qu'les Jèrriais sont v'nues aidgi ichîn. J'vis un contrat dans eune églyise a Christchurch l'aut' jour tch'avait té trouvé en dgiex-sept chent septante-trais (et tch'est tchiques chents ans pus vyi) et j'ermertchi qu'ieune des signatuthes sus l'contrat 'tait la cheinne d'un Giffard, - probablyément iun d's'anchêtres de ma m'mèe!

Iun des Dguides de la Cathédrale nouos disait, étou, qu'un bouan-homme Le Feuvre, tchi n'a pas té mort bein d's'années, soulait hanter l'sanctuaithe. I' pathaît tch'i' tait pathent à l'Amitha Jellicoe, et tch'i' tait un Moussieu. J'pense bein tch'i' tait d'scendu d'la famille des Tchithiéthes du Coin. Et pis, parmi les noms des Ministres d'l'Evêtché qui sont hors pays, l'y'a les Révérends G. Guiton (dans l'Indes), A.S. Le Moignan (à la Côte) et H. Marett (en Afrique).

Les villais d'ichîn ont ouï du Jèrriais à ches drein (car j'lé pâlons ichîn comme en Jèrri lé Juge et mé) comme lus Anchêtres en ouïyaient en dgiex chent souoxante-six quand not' Duc Dguilleaume 'tait par les c'mîns!

George d'La Forge
Les Chroniques de Jersey 27/3/1948
 

Viyiz étout:

 

Les Pages Jèrriaises