Jé t'pâlis, tu m'dîs deux-trais mots
Et d'un co j'tchiyis amouotheux.
J'restis êbézoui, jé d'vîns fo.
L'amour est pus fort qué dgiêx boeux.

Tes lèvres, rouoges, caudes, si douoches, si finnes...
Ta bouoche, la pus belle qué j'ai veue...
Jé n'ouais qu'ta vouaix si fémininne...
L'amour est pus fort qué dgiêx boeux.

J'dais té dithe et t'explyitchi
Les sentiments brûlants d'man tchoeu.
Jé n'peux rein faithe - j'sis oblyigi.
L'amour est pus fort qué dgiêx boeux.

Touos les matîns, i' m'faut té vaie
À dgiêx heuthes, onze heuthes et méjeu,
Rester auve té toute l'arlévée.
L'amour est pus fort qué dgiêx boeux.

Geraint Jennings
Févri 2000

"L'amour est pus fort qué dgiêx boeufs" est un vièr diton Jèrriais.