|
Un pape brait dans la bouochel'lie; des d'gouts dé peintuthe font des vars; des barres d'couleu - un fond rîlyi; ch'est Francis Bacon - ch'est dé l'art. Des gal'lies d'Bacon à la Tate; des papes pliaichis dans des siêx-carres - trais papes sont à braithe dans lus boêtes; v'là tch'est du Bacon, v'là tch'est l'art. Des brueûtchets houtchis sus un cro; la viande vendue driéthe ches barres; nou dgette du ma, nou vait du dro; des steaks à Bacon et dé l'art. Les roses et oranges d'puthent dé sang; les papes blyînquent - lus leunettes barbares dans lus cages dé vèrre en bêclian ont d's èrfliets d'Bacon et dé l'art. I' dgettent, les mêssieurs à chapieaux; nou s'couoche au liet, nou couoche lé mar; nou-s'êcouoche des papes coumme des vieaux dans l'bel à Bacon et dé l'art. Ches faches féthées font des sifèches; les muscl'yes teurtchis coumme un vatard; nou-s'est dêbouêtchi en fouaiblièche acanté Bacon, auve dé l'art. Et dans un mitheux martélé nou fait des teurts, nou fait lé quart; et dans ches boêtées quartellées y'a des papes, Bacon et dé l'art. Geraint Jennings à l'exhibition d'Francis Bacon à la Gal'lie Tate, Londres, 22/12/2008 |
Viyiz étout: