I' fait bein caud - nou d'puthe dé sueu;
Lé ciel est bliu et cliai;
Lé monde a eune chanson au tchoeu,
Et les êvêques sont dgais.

Lé solé lit coumme un souôri
Sus les louêmes de la baie;
Lé Châté est ensolilyi,
Et les êvêques sont dgais.

Les mousses font lus châtchieaux d'sablion;
Lus pathents aiment les vaie
À couôrre et jouer coumme des catons -
Et les êvêques sont dgais.

Nou mange des saûciches à la broche,
Des pizzas ès anchouais...
Ches fricots mettent l'ieau à la bouoche -
Et les êvêques sont dgais.

Les cats rithent, et les êtchutheurs,
Et même les bêtes à saie.
Les hérissons, ieux, sont heutheurs,
Et les êvêques sont dgais.

Les Méthodistes halent lus castchettes,
Lus c'mînses et lus courtes braies;
Les Recteurs font des calipettes,
Et les êvêques sont dgais.

Les Cardinnaux à Rome condamnent
Les péchés dé la chai,
Mais l's Anglyicans éthont du fanne -
Les êvêques, véthe, sont dgais.


Geraint Jennings
Août 2003