Le Député Laiesse Poudret                Candidat pour Connêtablye.
Râchel Poudret                                        Sa femme.
Lise Poudret                                        Lus fille.
Tom Le Brun                )                        Deux pârouaissiens du contre parti.
Charles Verdon                )                        
Le Chent'nyi George Ernon
         

         Scène
         

         L'année 1900.
         
         La tchuisine siez Laiesse Poudret, à 2 heuthes du matin la niet dévant l'éléction. L'apartement est êluminée par la cliarté d'la ieune, deux hoummes entrent par la f'nêtre; ch'est Tom Le Brun et Charles Verdon. Ils ont un grand portrait auvec ieux.
         
Charles         Va douochement don, pourre bachouard!

Tom        Ah ch'est bein! --- Semnage, nou n'y vait chin-terre, as-tu chutte chandelle la?

Charles        Oui.

Tom        Allume la don, ou j'allons nos trebutchi sus tchique chose.

        (Charles qu'a mins le portrait sus eune tchaise allume eune chandelle et ergarde iou qu'i' peut la mettre).

Tom        Man bouanhomme, ergarde-mé les boutelles, ch'est d'tchi bouan! Ma fé en v'chin eune viède, mâte la chandelle dans l'co et j'y vèrrons mus.

        (I' mettent la chandelle dans l'co d'la boutelle).

Charles         Pooh, i' n'dait pas y'aver de purchons ichin d'dans valet! Sents tu la fumée d'cigarre? J'ai deux autres chandelles, ch'est d'les allumer. (Ils allument les chandelles). A-ch't-heu ch'est d'nos y mettre. Iou qu'j'allons c'menchi?

Tom        Par aver eune fais à béthe bein saieux, j'm'en vais en verser.

Charles         (qu'a ouvert le bas d'la chiffoniéthe). Ne v'chin d'la gâche, ch'est d'en aver un mio.

Tom        Ma fé véthe, y'a t-i' un couté a la traine?

Charles         J'ai ma brioche. (I' déhalle sa brioche et l'ouvre).

Tom        Ou n'a pas l'air sept fais trop propre.

Charles         J'ai gratté un couplye d'bêngies d'souidiches auvec à ch't arlevée.

Tom        Tu-ès fichu d'nos êmpouaisoner!

Charles         Bah, v'la tchi t'chac'ra les vers du corps si tu-es as.

        (Charles coppe la gâche et i' lus assievent à béthe et mangi).

Tom        I' n'faut pas nos t'nin ichin trop longtemps.

Charles        As-tu la frousse té?

Tom        Nennin.

Charles         J'avons toute la niet man garçon, j'ai veut l'bouanhomme Laiesse dans les dgiex heuthes et i' 'tait dêjà un mio êcauffé. J'gage qu'i' ronflye coumme un perdu la haut.

Tom        Y'a les femmes étout.

Charles         Bah i' d'vaient êtres mortes lâssées auvec touos les aprêts pour demain. Sus autchun sens i' couochent de l'autre but d'la maison.

        (I' continue à pâler et n's'apperchevent pas que la porte driéthe ieux à ouvert douochement et que Lise est à l's êcouter. I' continuent a mangi et béthe).

Tom        Ou'est qu'j'allons pendre le portrait?

Charles        A rempliaichi ch't-i' la sus l'foyi.

Tom        Et pis auprès?

Charles        J'allons tapper à la porte de d'hors et faithe des brées pour le bouanhoumme.

Tom        Et pis j'f'thons la minne que quand j'passaimes j'avons veut deux gas sorti de d'dans l'bel et s'n aller a la course avau la route.

Charles        Bah i' d'vaient êtres mortes lâssées auvec touos les aprêts pour demain. Sus autchun sens i' couochent de l'autre but d'la maison.

        (I' continue à pâler et n's'apperchevent pas que la porte driéthe ieux à ouvert douochement et que Lise est à l's êcouter. I' continuent a mangi et béthe).

Tom        Ou'est qu'j'allons pendre le portrait?

Charles         A rempliaichi ch't'-i' la sus l'foyi.

Tom        Et pis auprès?

Charles         J'allons tapper à la porte de d'hors et faithe des brées pour le bouanhoumme.

Tom        Et pis j'f'thons la minne que quand j'passaimes j'avons veut deux gas sorti de d'dans l'bel et s'n aller a la course avau la route.

Charles         Faut dithe que j'lus avons fichi la chasse mais que j'les avons perdus dans l'clios à pomièrs à Nick Bliampi.

Tom        Eune bouanne idée!

Charles         Tu sais bein tchi faithe auprès?

Tom        Véthe. I' s'en va être fo quand tu t'en vas l'attchuser d'aver volé le portrait de tan grand-péthe de d'dans la Salle Pârouaisaille.

        (I' rient touos les deux).

Charles         Je n'sis tchille histouéthe qu'i' nos cont'ta pour tâchi d's'en dêhaller?

Tom        V'la tchi s'en va valer la peine de oui, mais ch'est un coup d'chance que le tchein est la même chose, frême et tout.

Charles         Faut faithe assez d'cas pour les femmes à d'valler étout.

Tom        Tu-ès capablye de prendre le mors en dents té, si parchance que Lise d'valle dans sa c'minsolle.

Charles        Oh l'dgâtre crait tu ---

Tom        Bah n'té gêne pas, mais dit-mé, es-che que tu n'as pas pensé qu'ou' t'f'thait bein à té? Ou' peut faithe étout ma fingre.

Charles         Je n'sais janmais coumment la prendre, oulle est farceuse la garçe.

Tom        Prins-tu d'avis en lyi à la Chapelle dînmanche passé, oulle avait eune blieue robe; ch'est qu'ou pathaissait raide bein valet.

Charles         Tch'est qu'tu-avais qu'faithe d'être à la r'garder d'si près, té qu'a eune femme.

Tom        I' n'y a pas d'ma a r'garder!

Charles        Oulle a belle et bein pus d'trente ans.

Tom        V'la tchi n'a rein a y faithe, et pis tu n'est pas un poulet d'autre en tout té. J'té gage que tu n'éthais pas l'affront de lî d'mander de la r'condithe auprès l'service dînmanche tchi veint.

Charles         Mon doue si.

Tom        J'té gage eune pieche d'êtchu qu'tu n'le f'thas pas.

Charles        Entendu.

Tom        Coumment qu'tu t'y prendras?

Charles         N't'en fait pas, y'a pus d'eune manniéthe à tuer un cat!

Tom        J'té souhaite bouanne chance. Veurs-tu eune autre fais a béthe?

Charles        Nennin, ch'est d'êchangi les portraits, et èspéther que l'bouanhoumme nos en dounn'a ieune pour notre embarras bétôt.

Tom        Vé-t'en don.

        (I' ramasse le portrait et Charles monte dans eune tchaise dêpend l'autre et erpend le sien qu'ils ont apporté à sa pliaiche).

Charles         Est-t'i' drait?

Tom        Oui, a un pousse ou deux d'près. Tch'est qu'faut faithe de ch't chin?

Charles         Fouorre le souos l'sofa.

        (Tom va mettre le portrait souos l'sofa).

Charles         Ch'est d'laissi les chandelles alumées et tout tel qu'il est, j'nos n'allons pas être longtemps. Attends dgia, aide-mé ichin.

        (I' ramasse des posteurs de d'dans sa pouchette et i' les mettent le tou d'l'apartement).

Tom        (riant). Ma fé justement chein qui fallait!

Charles         En v'la assez, vé-t'en.

        (I' s'en vont par la f'nêtre. Lise qu'a veut et entendu tout de driéthe la porte, entre, et ramasse le portrait de d'souos l'sofa et la r'pend à sa pliaiche).

Lise         V'la tchi s'en va apprendre à ches deux apautres la de n'conter pas lus pouochins d'vant qu'i' s'saient êclios.

        (Ou' s'en va pour mettre l'autre portrait souos l'sofa).

        J'ai grand r'gret, mais i' faut que j'vos fouorre souos l'sofa Mons. l'Connêtablye Verdon, mais ch'est d'la faute a vot' p'tit fils, chut pendeloque la d'Charles.

        (Ou' fouorre le portrait souos l'sofa).

        Les prechaines dgiex minutes dév'thont être bein interessantes valet.

        (Coumme 'ou s'en va nou' ouait tapper à la porte de d'hors, et des brées dans l'bel. Eune s'gonde auprès, Mais Laiesse Poudret crouaise l'apartement en route pour la porte de d'hors).

Laiesse         Sacré milles pipes, tch'est qu'chounn-chin veurs dithe! Ch'est bein j'm'en veins --- i' n'y a pas qu'faithe de dêfonser la porte!

        (I' s'en va, et nous entend des vouaix dans l'allée et i' r'entre suivi par Charles et Tom).

Laiesse         Ou' l's avez veuts, ou' dites?

Charles         Véthe j'avons pensé que j'f'thaimes mus d'vos l'dithe.

Laiesse         Ous avez bein fait, si j'lus mets la patte sus l'co ---

Tom        Ma fingre j'n'éthais janmais pensé de trouver tant d'support pour le contre parti siez vous, Député.

Laiesse         Presti, crai-tu que j'f'thais décorer m'n apartement auvec d'ité! Tchiqu'uns s'en vont aver a rêpondre pour chounn-chin!

        (I' va a la porte et crie es femmes).

        Râchel! --- Lise! --- d'vallez a bas toute suite!

        (Tom et Charles ont d'la peine a n'rithe pas, et pis Tom s'appercheut que l'portrait a 'té changi et continne Charles).

Laiesse         Je n'sais s'ils ont volé tchiquechose, (I' c'menche a ouvri les tithettes de la chiffoniéthe et fouôllyi d'dans).

Charles         Y'a t'i' autchunne chose qui manque?

Laiesse         Ah je n'sais pas, ou'est qui sont ches femmes la don! Râchel --- Lise --- dêpêch'ous ---

        (Les femmes entrent).

Râchel        Man doue d'la vie, tch'est qui y' a don? J'pensais qu'la maison 'tait a feu.

Laiesse         Tch'est qui y'a, milles pipes ne v'chin tch'est qui y'a!

Lise         Ah mais ergarde tout chounn-chin M'mée!

Râchel        Mais tch'est qu'v'la tchi veurt dithe Laiesse?

Laiesse         Que j'avons ieut des malfaiteurs ichin bein saieux.

Lise         Et j'n'en avons entendu rein. (a Tom et Charles). Mais coumment qu'ch'la s'fait qu'ous êtes ichin vous?

Charles         J'avons veut deux gas dêhaller de d'dans l'bel justement coumme j'passaimes.

Lise         Accouo bein qu'ous 'taites dans l's alentours.

Râchel        Par ou'est qu'ils ont entré?

Laiesse         Je n'sais pas.

        (Lise va a la f'nêtre).

Lise         I' sont v'nus par la f'nêtre. Oh minse, j'avais oublié a la barrer!

Râchel        Manniéthe d'êrchervellée va!

Charles         Ils ont laissi ches chandelles la alumées.

Râchel        Ou'est qui 'tait lus idée?

Tom        Ous éthaites peut être fricachies au liet sans l'saver.

Laiesse         Je n'crai pas qui y'a autchunne chose qui manque Râchel.

Râchel        Coumment qu'tu peux y vaie dans les ténebres coumme chounn-chin, alumme la lampe Lise.

        (Lise alumme la lampe et Charles lî dounne un coup d'main).

Râchel        Laiesse, dêteint ches chandelles la, ah mais j'en si les gambes toutes fâillies mé.

Lise         Assied-té M'mée, ch'est qu'j'en avons des décorations valet.

Laiesse         Gâsdaouelle! J'sais bein que j'soummes en éléction mais j'appelle de tchi coumme chounn-chin des tours de sallops.

Charles         Ah damme véthe dgia, a votre pliaiche mé j'appell'ais la police.

Tom        Ah véthe, ou n'pouvez pas laissi eune telle affaithe sans en faithe dévé. Ergardez j'm'en vais aller cherchi l'Chent'nyi Ernon, j'n'en ai pas pour longtemps.

Laiesse         Nouffait nouffait ---

Charles         Si si, ch'n'est pas d'embarras, va Tom et j'm'en vais rester ichin en cas qu'i' r'veindraient.

Lise         Véthe ch'est d'aver la police, que ches zouaves la qui sont v'nus s'saient faits payé pour lus bêtises. (a Tom). Marche cherchi l'Chent'nyi, et mercie.

Tom        (en s'n allant). Ch'est la l'mus a en faithe.

Laiesse         Si j'les happons j'vos garantis qu'il a éthont mal, aparti!

Râchel        Ergardez coumment qu'ils ont gobiounner la gâche, et oulle est toute salle.

Lise         I' lus sont aidgis a eune fais a béthe étout.

Râchel        Tchi honte tout d'même, d'aver telle chose a s'arriver justement parceque tu-as envie d'être Connêtablye et d'servi ta pâraisse.

Lise        Ah mais ch'est au pus fort la pouque dans ches bordées ichin.

Charles         Véthe, mais s'en v'nin siez l'monde ---

Lise         V'la tchi n'mé ravie pas, i' dait y'en aver des salles caractéthes dans l'contre parti.

Laiesse         Eune bande de mal-polis --- va t'en mettre des habits coumme i' faut Râchel, et té Lise, George Ernon n'a pas qu'faithe de vos vaie attentées d'la sorte.

Lise         Ma fingre nan, vé-t'en M'mée.

        (Les femmes s'en vont).

Charles         Allez étout Député, j'm'en vais rester ichin.

Laiesse         Mercie man garçon, j'n'en ai qu'pour un instant.

Charles         N'vos pressez pas.

Laiesse         (en s'n allant). Aide-té a eune fais à béthe.

Charles         Mercie bein des fais.

        (Quand Laiesse est bein hors Charles cherche pour san portrait et l'trouve souos l'sofa. I' fait l'êchange eune deuxiême fais).

Charles         (en pendant l'portrait). Je n'sais pas coumment qu'tu t'es trouvé souos l'sofa té Pappa Verdon, mais j'ai eune idée à-ces-sé.

        (Vite i' verse eune fais à béthe et Laiesse r'entre).

Laiesse         Ma pouorre femme en est toute boulversée, ergarde-mé tout chounna, j'm'en vais pitchi tout chounna souos l'ticque.

Charles         Laissez les, n'faut pas touchi rein dévant qu'le Chent'nyi arrive.

Laiesse         Verdon, pour Connêtablye --- Nickless Verdon est t'n onclye, j'l'oppose demain mais je n'crai pas pour eune minute qu'il est responsablye pour chounn-chin.

Charles         Mais bein saieux qu'nan.

        (Les femmes entrent).

Râchel        Laiesse, verse mé un p'tit gouttin d'tchique chose pour mé ravigotter, j'sis toute boulversée.

Laiesse         Eune raide bouanne idée, j'm'en vais en aver eune fais étout, et té Lise?

Lise         Oui, eune petite goutte de vin pour mé.

        (Ou ramasse les verres et Laiesse verse le béthe).

Lise         Le tchein bouan M'mée.

        (Ou ramasse san verre et justement coumme ou' s'mets a béthe ou vait l'portrait et n'a que d's'engouer).

Râchel        Va douochement don Lise, n'ou' n'avalle pas d'ité coumme de l'ieau!

Lise         J'ai avallé un mio d'travers, ch'est bein.

Charles         (ergardant l'portrait). Eh bein ma fingre, je n'savais pas qu'ous avaites le portrait à Pappa Verdon ---

Laiesse         Hein --- eh bein minse!

Râchel        Ah man doue, ch'est pas l'notre chounna!

Charles         Ou l'avez êmprunté ou' voulez dithe?

Laiesse         Mais damme nouffait!

Charles         Mais il est pendu sus votre ais du foyi pourtant.

Laiesse         D'ou'est qu'ch'la veint, sabre de bouais ---

Charles         Ch'n'est pas l'votre don?

Râchel        Certainement qu'nan!

Lise         I' r'semblye au sien de d'dans la Salle Pârouaisaille.

Charles         Ch'est justement la chein que j'tais à penser mé.

Râchel        Ah mais tch'est qu'j'allons faithe, oh la la la la ---

Laiesse         J't'en prie en grâce Râchel tais-té!

Lise        Mais coumment qu'i' s'est trouvé ichin?

Charles         I' n'yn a pas marchi ---

Râchel        Bein saieux qu'nan, mais tch'est qu'i' y'a mins?

Charles         'Ous avez 'té à la Salle à-ces'sé es-che'pon Député?

Laiesse        Véthe.

Charles         Av'ous prins d'avis si le portrait 'tait a sa pliaiche.

Laiesse        Oui dgia.

Charles         Et il est ichin à-ch'teu! Vos êtes 'ous enr'venus tout seu?

Laiesse         Oui, mes supporteurs se sont trouvé ichin ---

Charles         Humph! Etes 'ous seurs qu'ou n'avez pas joué eune petite farce étout à-ces'sé?

Laiesse         Manniéthe d'affronté, ès-tu en train de m'atchuser d'aver prins chu portrait la?

Charles         Eh bein pas autchuser ---

Râchel        Absolument, tu dait bein saver que l'Député n'îthait pas faithe un té coup!

Charles         Il éthait ieut la chance de s'en êmpauter.

Lise        Ch'est vrai tu sais P'pée, l'affaithe ne pathais damme pas bein.

Laiesse         L'affaithe ne sent pas a bouan tu veurs dithe.

Râchel        Ah la la, le Chent'nyi s'en veint.

Lise        I' s'en va y'en faller d's explications.

Laiesse         J'vos dit que j'n'ai ieut rein a y faithe. Ch'est l'travas de ches deux apautres la qui sont v'nus d'vant.

Charles         Le Chent'nyi s'en va t-i' vos craithe li?

Râchel        Nennin i' vote Verdon.

Lise        Si chutte affaithe ichin est dêcou'erte, l'éléction est capablye d'être arretée.

Râchel        Ah man doue! I' n'y a qu'eune chose a faithe don, i' faut l'muchi.

        (Ou happe eune tchaise).

Laiesse         Ou'est qu'est l'notre?

Lise         Je n'sais pas ---

Râchel        J'n'avons pas d'temps a perdre, dêpends le té Lise.

        (Lise prends la tchaise de sa méthe et va pour monter d'dans).

Charles         Va douochement tu pourrais t'trébutchi, laisse mé l'dêpendre pour té.

Lise        Mercie.

        (Charles monte dans la tchaise).

Laiesse         Va s'y douochement.

Lise        Attends Charles, je n'pouvons pas l'ôter 'ou savez, j'n'avons rein a mettre pour le rêmpliaichi et l'Chent'nyi s'ra saieux de s'apperchever que l'portrait à Pappa manque.

Laiesse         I' l'a veut la des fais sans nombre.

Râchel        Je n'pouvons pas l'laissi la, s'il vait je s'sons finis.

Laiesse         Et je s'rai pour la P'tite Cour mé!

Charles         'Ou s'rez capablye de fini d'vant l's Assises.

Laiesse        Sapresti d'mâtin nos v'la dans un bieau pité!

Lise         I' n'y a qu'eune chose a faithe, faut l'dêgiser.

Râchel        Mais coumment?

Lise        Pappa Poudret avait eune moustache coumme eune bringe d'êtablye dans san portrait es-che'pon?

Laiesse        Véthe.

Lise         Eh bein ch'est d'en mettre ieune au Connêtablye Verdon.

Charles        Ah nouffait --- ou n'pouvez pas ---

Lise        Si si, et l'Chent'nyi n'prendra p'têtre pas trop d'avis ---

Laiesse         Je n'm'y fièthais pas trop.

Lise        I' vaut la peine d'êprouver tréjous.

Charles         Je crai pas qu'ou dév'thaites --- ch's'rai pitchi ---

Lise         J'n'avons pas d'chouaix, tu-es dêjà monté la haut té Charles de même astique li eune moustache.

Charles        Ah nouffait pas mé!

Lise        Mais pourtchi pas?

Charles         Ch's'rai gâter l'portrait.

Râchel        Piche du portrait, dépêche té don.

Lise        Véthe, s'il est gâté eh bein les siens qui l'ont prins pouorront en subithe les consequences, i' sont saieux d'être prins.

Laiesse         J'les achouamithais si j'les t'nais a la minute!

Râchel        Tch'est que j'pouvons faithe servi pour lî mettre eune moustache?

Lise         Y'a tout pliein d'sie dans la chimnée.

Charles         Tu n't'en vas pas faithe servi d'la sie!

Lise        Nan pas mé, té dgia, frotte tan dé dans l'engoulême de la chim'née.

Charles         A grands maux grands r'mièdes, dêbrouâlle té.

        (Charles d'valle et frotte san dé dans l'bas d'la chim'née).

Charles         Ah l'dgâtre! Semnâge ch's'rai pas un ma qu'ous éthaites la chim'née ramonée, ergardez j'sis tout douôllyi mé.

Râchel        Ne belle pas tant d'ta becque, la moustache don ---

Laiesse         Ne c'menche pas a t'exciter té Râchel, ou bein tu-ès capablye de nos vendre quand George Ernon s'en va arriver.

        (Charles ermonte dans la tchaise).

Charles         J'm'en vais pas prendre la responsabilité pour chu salle travas ichin.

Laiesse         Personne n'en séthont rein.

Lise        Nan j'le néttithons quand le Chent'nyi s'sa hors.

Râchel        Et pis Laiesse îtha la r'mettre à sa pliaiche dans la Salle.

Laiesse        Véthe, véthe --- semnâge je r'séthons frais pour l'éléction demain.

Lise         I' n'y étha pas d'éléction si Charles ne s'dêbrouâlle pas. Frotte tan dé souos l'nez au bouanhoumme don!

        (Charles c'menche a frotter la sie sus l'portrait).

Charles        (ergardant san travas). Ma fé ch'n'est pas mal dit!

Laiesse         Pas nier assez, frotte n'en accouo.

Charles        I' m'faut accouo d'la sie. (I' d'valle).

Lise        Tu l'as minse un mio crotchue.

        (Charles ermonte dans la tchaise).

Râchel        Véthe oulle est pus basse d'un côté que d'l'autre.

Laiesse         Mets y'en la peine y'a tout plein d'sie.

Lise        Pus néthe Charles pus néthe.

Charles         Je n'peux pas, je n'ramasse pas assez d'sie sus man dé et je n'm'en vais pas être a fouôllyi amont la chim'née toutes les deux minutes.

Râchel        Ah mais, t'en faut t-i' d'l'embarras tout d'même!

Charles        Eh bein faites le vous même s'ou pouvez l'faithe mus.

Laiesse         Manniéthe d'affronté! Lise ramasse d'la sie dans la palette.

        (Lise fait coumme san péthe lî dit et tcheint la palette en haut pour Charles).

Lise        La aide té.

        (Charles continue a travallyi sus l'portrait, les autres ergardent).

Laiesse         V'la tchi n'est pas mal ma fé!

Râchel        Nan, à-cht'heu frotte n'en un mio sus san moton et l'côté d'ses jaues.

Laiesse         Justement car Pappa Poudret 'tait si né qu'i' n'pathaissait janmais frais râsé.

        (Charles fait coumme i' disent).

Lise        En v'la assez, i' n'faut pas en r'faithe trop.

Laiesse         En êffet, veint l'ergarder d'ichin.

Lise         I' n'pathais pas tant mal dit.

Charles         J'crai bein que les siens qui pass'raient en d'hors de la Corbiéthe dans un êpais d'bliaise n's'apperchevraient pas d'rein.

Râchel        Ses g'veux pouorraient êtres pus nièrs.

Laiesse         Véthe, erjuque-té la haut et nièrchis les.

        (Charles fait chein qu'est nécessaithe).

Râchel        Ah ch'est bein mus d'même.

Laiesse         Tu-as la clié du ticlye man garçon.

        (Nous entend tapper).

Laiesse         Ne v'la l'Chent'nyi.

Charles        S-i' m'avait coumme chounn-chin i' s'en va s'douter ---

Râchel        Allez dans la tchuisine, dounne li de l'ieau pour se laver, Lise.

        (Lise et Charles s'en vont).
        (Laiesse va ouvri la porte pour Tom et l'Chent'nyi).

Chent'nyi        Bonsoeur Missis Poudret.

Râchel        Bonsoeur, i' vos a prins eune pose a vos trouver ichin.

Tom        Je n'pouvez pas l'rêvillyi. J'ai les mains en margalo a forche d'capuchi sus la porte.

Chent'nyi        I' n'y avait pas longtemps que j'dormais, j'tais dans man préunmié soumme.

Tom        Ou' d'vaites être sans connaisance!

Laiesse         Enfin vos v'chin.

Chent'nyi        Véthe, en bein tch'est qui s'est arrivé exactement?

Laiesse         Y'est v'nu tchiqu'uns ichin quand j'avons 'té couochie. Ergarde pour té même.

Râchel        I' lus sont aidgis à eune fais à béthe et d'la gâche.

Chent'nyi        Ont t'i' fait du d'gas?

Laiesse         Nennin, mais ils ont entré par la f'nêtre et mins lus fichus posteurs partout.

Chent'nyi        Ch'n'est pas bein séthieux chounna, et assez que ch'est la niet d'vant l'éléction.

Râchel        V'a tchi n'les extchuse pas.

Chent'nyi        Nan, mais j'dithais que ch'la a 'tait fait pus en fonne qu'aut chose.

Laiesse         Ch'est des tours de sallop!

Chent'nyi        Je n'dithais pas chounna, ch'tait qu'eune farce; accouo auprès tout fallait bein s'attendre a tchiquechose à s'arriver, les affaithes ont 'tait diversement trantchilles jusqu'a-cht'hue.

Tom        Ma fingre véthe, j'ai dit chounna à Charles à-ces'sé --- ou'est qu'il est, i' n'est pas hors siez li, es t'i'?

Râchel        Nan il est dans la tchuisine à laver ses mains.

Tom        Bon tch'est qu'il à 'tait a faithe pour les salli?

Laiesse         Pas rein, crie li Râchel.

        (Râchel s'en va à la porte d'la tchuisine).

Chent'nyi        J'comprends que ch'est Charles Verdon qu'a veut les gas qui sortaient de d'dans l'bel.

Tom        Véthe et j'lus avons fichi la chasse.

Chent'nyi        Ou n'les avez pas erconnus?

Tom        Nan.

Chent'nyi        Ch'est drôle i' fait bieau clié d'leune.

Tom        I' 'taient ---

        (Charles et Lise entrent suivis par Râchel).

Charles         Bonsouer Chent'nyi l's av'ous happés?

Tom        Nennin j'nos soummes env'nus tout drait ichin.

Charles         Ah l'dgâtre ils ont ieut l'temps d'être à St Ouen par à-cht'heu!

Lise         J'sis saieuse qu'i' n'sont pus si liain coumme chounna.

Râchel        I' sont à ronflier dans lus liées s'ou me d'mandez.

Chent'nyi        Eh bein je n'peux pas faithe grand chose devant d'main au matin.

Laiesse         Soigne bein d'les trouver ou bein i' s'sont a lus vanter de lus coup à-ces'sé et a m'faithe fichi au monde.

Chent'nyi        I' n'y a pas d'doute.

Râchel        J'peux t'i' erpather l'apartement?

Chent'nyi        Oui, i' n'y a pas rein ichin pour m'aidgi, ou pouvez d'valler les décorations.

Laiesse         J'n'aime pas fort t'n attitude té George, i' m'semblye que tu-es gentiment amusé.

Chent'nyi        Ah nouffait --- mais ---

Râchel        I' n'y a pas a s'en ravi, il est iun des supporteurs à Nickless Verdon.

Chent'nyi        Mais ma chiéthe Missis Poudret ---

Râchel        Ne c'menche pas a m'faithe de tes bieau bieaux George Ernon, j'té counnais d'vielle main tu sais.

Chent'nyi        Attendez eune minute, tch'est qu'ou voulez dithe par chounna?

Râchel        Chein qu'j'ai dit, tu-ès accouo eune doleuse du vièr choutchet j'counnaissais tan péthe dévant té ---

Laiesse         Tais-té Râchel! Veurs tu t'faithe ramasser ---

Râchel        Eh bein qu'il âlle cherchi pour nos visiteurs a la pliaiche d'être la a ritonner dans sa moustache.

Lise         N'té gêne pas M'mée i' s'en vont être happés et d'vant longtemps seulement. Et pis Charles et Tom ichin peuvent aidgi, ieux qu'ils ont veuts.

Charles        Certainement s-i' y'a moyen.

Lise        Accouo auprès tout ch'est ieux qu'en savent le pus, (A Tom) ou vos êtes trouvez par ichin justement au bouan moment, j'sis tchuthieuse de saver ou'est qu'ous avaites 'té à ch't heuthe la.

        (Tom qu'i' n'sais pas trop bein tchi rêpondre ergarde à len'tou d'li et vait l'portrait et est tout confu).

Tom        Ah bein --- le sé devant l'éléction --- nou n'peut pas tréjous dithe ch'est qu'nous est en faisant --- ni --- ni ou'est qu'nous à 'tait.

Lise        Damme nan v'la tchi n'f'thait pas.

Tom        (Mal à s'naise ergarde Charles qui n'sais pas trop tchi dithe n'tout).

Tom        Eh bein ma fingre Charles, je n'savais pas que tan grand-pêthe Verdon avait janmais ieut eune moustache.

Charles        Mais bein saieux qu'nan i' n'en avait pas!

Tom        Mais pourtant chu portrait la de li ---

Chent'nyi        Es tu fo té, tch'est qu'es a barbeloueter la don? Il est temps qu'tu-âlle te couochi.

Râchel        Ch'n'est pon ravissant à l'heuthe qu'il est.

Tom        Mais le portrait ---

Laiesse        Tu-as raison Râchel, mercie bein des fais garçons et té George --- je n'veurs pas vos cachi mais j'avons un fort jour l'avant nous ---

Tom        Justement eune minute Député (il appreche du foyi) véthe ch'est L'Connêtablye Verdon! Ergardez Chent'nyi ch'est bein li es-che'pon?

        (Le Chent'nyi s'appreche pour vaie).

Chent'nyi        Nou l'dithai et accouo y'a tchique chose de difféthent sus tchique sens.

Tom        Ch'est la moustache, ou n'viyis pas don.

Chent'nyi        Mais il n'en avait pas, es-che'pon Charles?

Charles        N'mé d'mandez pas ---

Chent'nyi        Semnage n'en r'véla, ch'tait tan grand-péthe!

Laiesse         Si j'ai un portrait du Connêtablye Verdon auvec eune moustache ch'est d'mes affaithes.

Râchel        Véthe v'la tchi n'vos concerne pas.

Tom        Ch'est eune risiblye moustache étout, j'dithais qu'ch'est un portrait coumme le sien dans la Salle et qu'la moustache à 'tait ajouôtée.

Râchel        N'en r'véla étout.

Chent'nyi        Humph ma fingre, tch'est qu'ous avez a en dithe Député?

Râchel        Rein du tout! N'lî dit pas rein Laiesse, vé-t'en Lise j'm'en vais m'couochi.

Chent'nyi        Eune minute Missis Poudret --- eh bein Député --- chut portrait la vos appartcheint t'i'?

Laiesse        Nennin.

Chent'nyi        Es-che le sien de d'dans la Salle?

Laiesse         J'pense bein qu'oui, mais j'peux t'expliytchi ---

Chent'nyi        Sans doute, mais n'oubliez pas que l'sien qui s'extchuse, s'attchuse.

Râchel        Affronté va!

Lise        P'pée n'a ieut rien a y faithe Mess Ernon, j'avons trouvé le portrait pendu la auprès que Tom à 'tait hors vos cherchi.

Chent'nyi        Tu 'tait ichin té Charles es-che vra chounna?

Charles        Oui, j'ai pensé dans un temps que l'Député avait p'têtre joué eune farce a san conte, mais je n'crai pas quasi.

Râchel        Ch'dait être ches deux apautres la qui sont v'nus qui l'ont apporté.

Laiesse         Ch'est la cha qu'j'ai dit mais ou n'voulaites pas m'êcouter, 'ous avez 'tait prins d'peux.

Chent'nyi        Je n'sis pas ravi, ch'est eune séthieuse affaithe. L'av'ous trouvé tel qu'il est?

Lise        Nennin i' n'avait pas d'moustache, Charles en a mins ieune ---

Charles         Tu m'as forchi a la mettre, tu n'faisais qu'insister, oulle éspéthait qu'ou n'vos apperchevraites pas d'rein.

Chent'nyi        Ou'est qu'était votre idée! Ous êtes aussi coupablyes coumme les siens qui l'ont apporté ichin. Ch'est la propriété de la Pâraisse qu'ous avez sacagi d'la manniéthe. Avains à l'dêpendre Charles.

        (Charles monte dans eune tchaise et l'dêpend, Tom le prend d'li).

Tom        Ch'est qu'ous en avez fait tout a fait eune affaithe.

Chent'nyi        Assa, que j'vaie ---

Lise        Y'a p'têtre moyen de l'netti.

Râchel        Véthe, et Laiesse îtha le r'prendre à sa pliaiche et personne n'en séthont pus d'l'avant. Laiesse verse eune fais à béthe au Chent'nyi et es garçons.

Tom        Ah mercie.

Chent'nyi        Missis Poudret je n'peux pas oublier man d'vé pour l'amour d'eune fais à béthe. J'm'en vais prendre soin du portrait jusqu'a d'main, je n'peux pas vos dithe tch'est qu'en s'sa, mais à votre pliaiche je n'mé fiêthais pas trop que l'éléction étha lieu.

Laiesse         Ah milles pipes v'la tchi s'en va pathâitre bein étout!

Râchel        Ah mais man doue tchi honte --- j'allons être a la rislée de toute l'île.

        (Le Chent'nyi prend le portrait pour s'n aller).

Chent'nyi        Ch'n'est pas ichin le portrait de d'dans la Salle.

Lise        Bon mais coumment qu'ou pouvez dithe d'ité?

Chent'nyi        Le sien de d'dans la Salle à le nom au Connêtablye peint sus l'driéthe et le numétho 4 étout, pour inditchi sa pliaiche.

Râchel        Es-tu bein saieux?

Chent'nyi        Oui oui, j'ermertchi chounna quand j'aidgi à r'pendre les portraits auprès que la Salle avait 'tait fraiche peinte au Stembre passé.

Laiesse         Eh bein semnâge, j'vons d'être a nos faithe la bille pour rein.

Charles         Tchi coup d'chance pour vous --- eh bein Tom, t'en veins tu, il est temps de nos n'aller.

Chent'nyi        Tu f'thas mus d'emporter tan portrait auvec té! Erpends le à sa pliaiche dans la grande allée.

Charles        Tchi mé!

Lise        Véthe té, ta farce à êchouait man vyi, tu n'as pas 'té malin assez valet!

Laiesse         Veurs tu m'dithe que ches deux individus ichin sont responsablyes pour toute chutte comédie ichin.

Lise        Mais bein saieux ils y sont responsablyes, j'tais à les djetter quand i' sont v'nus le préunmié coup.

Tom        Oh minse!

Lise        J'les ai ouient à faithe touos lus plians, ch'est tout d'lus travas chounn-chin.

Chent'nyi        Faut t'i' les ramasser Député?

Râchel        Nennin, êcoute Laiesse. (ou murmuthe dans l'ouothelle à Laiesse).

Laiesse         Eune raide bouanne idée! Eh bein mes vièrs j'vos tchiens!

Charles        Véthe Député.

Laiesse         J'sis prêt à roublier tout a condition ---

Lise        Ne sais pas si bête P'pée i' méthitent chein qu'i' lus veint.

Laiesse        Véthe mais j'soummes en éléction et coumme j'ai dit d'vant, j'sis prêt a roublier tout a condition qu'ou m'dounnez votre patholle, que demain ou vot'tez pour mé.

Tom        Es-che la tout?

Charles        Mais je n'peux pas voter contre m'n onclye mé.

Laiesse         Ch'est à té a chouaisi.

Tom        Bah, Mait' Nickless n'en sétha rein.

Charles        Ch'est tout bein pour té!

Laiesse         Eh bein tch'es qu'en est, si tu n't'accorde pas tu n'vot'tas pas du tout car j'f'thai d'sorte qu'ou s'rez au cliou mes vièrs.

Tom        Dit oui don Charles! Oui Député ch's'ra un pliaisi, ous avez ma patholle. (I' chaquent de main).

Râchel        Tu-as raison tu sais, et tu veindras aver eune tasse de thée et d'la gâche demain.

Lise        I' n'a pas qu'faithe d'invitation ergarde coumment qu'i' s'est aidgi à-ces'sé.

Chent'nyi        Et bein Charles?

Lise        Tu t'es mêlé dans tes touônés coumme i' faut té Charles.

Charles        En êffet, ch'est bein don j'vos dounne ma patholle étout Député.

Lise        Faudra qu'tu t'leve de bouan matin s'tu-as janmais envie de rêussi a nos jouer eune farce par ichin.

Chent'nyi        Sais ermerciant qu'tu'en as erpathé a si bouan marchi.

Charles        A bouan marchi! Et pis man portrait tout nièr de sie. Tu m'as forchi à l'douôllyi d'la sorte quand tu savais bein tout l'temps qu'i' m'appertenait. (frottant l'portrait). Janmais v'la tchi n's'en va sorti!

Lise        I' pouorrait être piéthe, et pis v'la tchi t'sert bein! Eune autre chose, tu n'as pas qu'faithe de v'nin t'trainer l'tou d'mé auprès la Chapelle dînmanche car tu-éthas mal-aparti; tu-as bein perdu ta gagâlle man vyi! Soigne bein qu'i' t'dounne tes sou Tom. Le pus malin peut s'y troumper tu sais, la tcheint bouan tan portrait! A d'main.

        (en disant chounna Lise tappe le portrait sus la tête à Charles et il est resté la auvec la frême le tou du co).

Ridgeaux.