Les Pages Jèrriaises

Le désappointement d'notre Julie


Notre Julie fut einviteaie pour diné un Noué,
Où n'voulit pan mangi fort à san daîsjeuné,
Car comme où dit faut que j'laisse du reun pour man diné,
J'men vais t'y en mangi, j'men vais t'y fricotté.

Hélas!!! ne v'la t'y pas à san grand désappointement,
Quand ou'l arrivey n'sont qu'à piuïmé l'picot douochottement
Yieun des êfans tet à plé les pommes-de-terre
Et deuex-strès aoutres étaient à lavé les verres.

Y n'avaient pas même oùquo fait lus podein,
Les uns étaient à aispïutchi la coreinthe et l'raizein,
D'aoutres 'tais à koppé le "suet" et le limon,
Notre Julie dizet en yï même chu podein là ne sça pas bon.

En aisfet, y n'tet pas bon, y n'avet pas boïeyï asseais longtemps
Quand ils êprouvirent à l'mangi y restet quïutet sus lus dents,
Y le r'meinr'nt dans l' "sauce pan" à boïeyï pus longtemps
Mais personne n'en mangirent, y n'tet pas prêt en temps.

Quand y virent que l'diné n'avanchet pas du tout,
Y lus donnirent du fromage, du pain, et du jambon,
Enfein lus diné fut meins sus la tabyïe à la fein,
Y lus meindre tous à mangi; et bèthe, car ils avaient sçé.

Les pommes-de-terre, les r'gardais avec lus grands yeux,
Ils avaient tet pleaies en hâte: y n'avaient pas ôtet les yeux,
Notre Julie avet grand r'gret d'avé tet là diné,
Ou s'dis bein des fais j'voudrais r'être bein siez mé.

Et pis ouprès l'fricot la femme de la maison
S'endormit trantchillement; nou n'entendait pas un son,
Sinon p'tit d'temps après; y se meindre tous à joué,
Les uns s'meirent à chanté; et les aoutres à dansé.

Mais notre Julie pensit bein des fais au fricot
Qu'oul éthait yieu siez yi, mais où n'en dis pas un mot,
Et fut bein contente quand le temps arrivit,
Pour yi à les tchitté, et s'en r'venai siez yi.

Le piaîzi finît tréjous par l'engnit.

Georgie

 

Viyiz étout:

 

Les Pages Jèrriaises