Les Pages Jèrriaises

Du Podin d'Riz

Mangiz, mangiz
Du Podin d'Riz.

Pour mé faithe fête, grand fête,
Quand j'm'en vais diné d'tchique bord.
I' faut pas m'offrit des crèpes
N'ya qu'à m'présenté d'abord
Du Podin d'Riz.

Touos les Dimanche, siez nous
Pour man diné j'veurs avé -
Pas d'boeu rôti au fou
Pas d'p'tit jeune lard intou,
N'ya qu'seulement à dêhallé
Du Podin d'Riz.

Si j'ai bouan appetit,
En rentrant des clios au sé
J'n'veur pas d'gache à mangi.
J'n'veur pas avé d'pastry,
Mais j'dai tréjous acceptai
Du Podin d'Riz.

S'ou vos trouvez faillis,
Qu'ou n'savez d'tchi vos nourri
N'prenez pas d'méd'cinne
Ni ditelle salopp'thie,
Mett'ous bein vite à mangi
Du Podin d'Riz.

Pour faithe un raide bouan r'pas
Et l'apprécié comme i' faut,
Pas qu'faithe de changi d'pliats,
Pas qu'faithe de graivin gras,
N'ya qu'à vos offrit, tout caud,
Du Podin d'Riz.

Mangiz-en d'grandes tchullèes,
Car ou n'trouv'thais rein d'miyeu,
N'importe ouest que ou's allez,
N'importe tchesque ou guôtez,
Rêgalous tréjous d'bouan tcheu
Du Podin d'Riz,
D'Bouan Podin d'Riz.

 

Ph'lippe d'la Golarde

 

Viyiz étout:

 

Les Pages Jèrriaises