|
Nou freunm'tha les églyises, nou bârr'ra les chapelles; les cathédrales viédgies, laîssies paître ès coucous. Halez les bancs et tchaires; dêteingniz les chandelles. Nou dêbouêqu'tha les crouaix, en halant bouais et clious. Toute en r'nonchiâtion d'ichîn un millénaithe, nou tâss'sa des mondrîns pouor couvri châque auté; nou much'cha les martyrs, nou n'trouv'tha d'aut' à craithe; nou laîss'sa touos les saints à rêver et haûter. Nou-s'entèrr'ra les dômes, châque tou et châque cliochi; nou bâtitha des hougues, les couvritha en bliête, et toutes les pièrres stchulptées s'sont muchies et enfouies; châque hougue - un ouothilyi, pouor y pliaichi sa tête. Et dans chu rêve ès hougues, les mystéthes restéthont embârrés souos lus couoches dé tèrre, glyise et galot; et si, bein à l'av'nîn, nou-s'en dêfouit d'ches monts, dêcap'lant les chapelles, et dêbliotchant les blios, tch'est qu'il' en craithont, ieux, les cheins du temps à v'nîn? I' trouv'thont nos êqu'sîns - des anges, des clius et buts; il' înmaginn'nont don d'la magie et du scîn et des dgieux stchulptés... coumme à l'Auté du Déhus. Geraint Jennings 2011 |
Viyiz étout: