Né v'chîn eune histouaithe tchi s'racontait pûtôt en Dgèmésy, mais nou l'a ouïe souvent en Jèrri étout. Eune fais y'a bein longtemps, i' pathaît, trais naviguants Jèrriais, et p'tits marchands, s'n allîdrent en Dgèmésy atout eune pétite cartchaiethon d'marchandises dans lus p'tit baté. Ayant vendu chein tch'il' avaient, profitabliément, i' voulîdrent lus rêjoui un mio l'sé. Ch'tait dans l'êté. Et don, dévant chèrchi à r'brousser c'mîn, i' bûdrent gentiment d'bouôn cidre. Quand s'vînt un temps i' s'êmancipîdrent dé remporter l'Île dé Dgèmésy auve ieux et d'la joindre à Jèrri! Tchi victouaithe, et tchi glouaithe pouor ieux s'i' pouvaient en r'pather, d'eune telle entréprînse! Ch'tait 'chîn l'coup d'mouontrer a lus vièrs ennemîns tch'est tch'en'tait, en l's abafouant, eune fais pouor toutes. Car, i' faut dithe tch'i' y'a tréjous ieu eune rivalité entre les deux Îles, mais sans doute bein piéthe aut'fais qué d'nouos jours.
V'là tout d'siette l'affaithe décidée. Maît' Ph'lippe, lé cap'taine du baté, donne l'ordre à san couôthîn Pièrre dé lachi eune anssiéthe à l'entou d'iun des rotchièrs pointus sus la côte à Jèrbourg, ou tchique bord par-là. Hé, v'là tchi fut fait sans pus ni mains. Lé vent 'tait bouon, toutes les vailes à haut et - file pouor Jèrri, tout en s'entre-heurlant: "Hale, Pièrre!, Hale, Jean!, Dgèmésy s'en veint!". Il' 'taient seux tch'i' t'naient l'Île chutte fais. Mais, lus confianche né duthit pon, comme dé raison. Lé coup d'satchet fit rompre l'anssiéthe, et les v'là tous les fours en haut dans l'fond du baté, à maîntchi êbaûbis et touos meurdris. Et Dgèmésy est acouo là au jour d'aniet!
Disons, enfin, qué nou racontait tout aussi bein l'histouaithe en Jèrri, souvent en dîthant qué ch'tait trais Dgèrnésiais tchi fîdrent chu coup d'vaillantise en r'sortant d'ichîn.
Viyiz étout: