Ch'est la preunmiéthe fais qu'la Fête Nouormande a prîns pliaiche en Dgèrnésy. L'affaithe c'menchit en 1998, quand les Nouormands dé Dgèrnésy, Jèrri et Nouormandie lus rêunnîtent à Montebourg, tandis qu'en 1999, ch'tait à Hamptonne en Jèrri. L'idée d'la rêunnion est d'augmenter les liens entre les gens des difféthents parties du duché, d'entre-pâler, danser, bagouler, jouer la musique et faithe d's èrcitâtions dans les difféthentes parlers Nouormands.
Ous avez probabliément d'vinné qué d'vant chutte fête en Dgèrnésy, j'n'avais janmais joué à la gamme dé Palet, mais nou m'dit qué ch'est hardi populaithe ichîn. La raîson en est qu' ch'est eune gamme pour toute la fanmil'ye, les règl'yes sont aîsies à comprendre, ch'n'est pas difficile à jouer et ch'n'est pon nécessaithe d'aver trop d'gréement.
Tchiquechose qué j'n'avais janmais veu d'vant à la Fête Nouormande est eune pathade d's habits du temps pâssé. Ch'n'est pon la promenade ès cats à Paris, Londres ou Milan, mais tout d'même, i'pathaît qu' nos modèles sont un p'tit mio nerveurs.
Pour les siens tch'aiment Madame La Mode, nou peut dithe qu'ches habits ont jusqu'à chent trente ans ou même pus, la majorité v'nant d'entre 1870 et 1900.
Ev'chîn Doreen dans eune robe faite de laine auve du brodage atou san co. Les jannes filles du college sont prêtes à prendre part étout, et pathaîssent hardi belles dans l's habits connus par lus arriethe-grand pathents.
Les danseurs de l'Assembllaïe d'Guernesiais sont tréjous bein populaithes, et eune grande partie de l'audienche veut les vaie danser les vielles danses sus la bliête. Lus danses sont ou traditionelles ou vîntent d'l'Angliétèrre. Viyant qu'l'jour est si caud, ch'est ermerquabl'ye qu'i's peuvent faithe un 'té bouan spectacle - ch'est certainment apprêcié par les gens de l'audienche.
Nos couôsîns Nouormands sont hardi fièrs d'lus pays pres d'la mé.
Les organisateurs d'la Fête Nouormande ch't année ont travailli dû pour asseûther l'succès de l'êvénement, et j'm'en vais pâler auve lus president, Bill Gallienne, pus tard. Dans la grande tente, i'y a des danses, des pièches de thiâtre et des èrcitâtions, mais en même temps, i'y a des gens tchi continnuent les vièrs traditions de l'Île - la fais'sie des gâches, des bannettes et du beurre comme le temps pâssé.
Viyiz étout: