Ch'tait touos les deux des hommes d'êducation,
Bain au couothant de ch'qui s'passait dans l'monde,
Et sus la politique de chaque nation
Jouissaient d'une connaissance des pus profondes.

Mais, chose êtrange, i'n'taient jamais d'accord
N'importe tchi sujet qu'i'distchutaient,
Iun trouvait qu'l'autre était tréjous dans l'tort,
Et ch'tait continuellement qu'i's'disputaient.

Quand dans Septembre, la dgerre fut dêcliathée,
Un chatchun exprimait s'n'opinion.
Duclios disait qu'la Pologne 'tait pathée.
Et sans doute, Pigeonnet insistait qu'non.

I's'quérellaient sus toutes espèces de choses,
L's affaithes de Cour, les décisions d's Etats,
Si iun votait "Louothi," l'autre votait "Rose"
Jamais n'y a ieu deux patheils scélérats.

Nou se d'mandait comment qu'nos deux apôtres,
Qui n'cessaient jamais de s'entre harandgi,
Restaient quand-même attachis l'un à l'autre,
Un dévouement que rain n'pouvait changi.

Mais toute chose a san but. Jean Pigeonnet
A frouaissi Bernabé d'une telle maniéthe,
Que jamais ch'la ne li s'sa pardonné.
J'm'en vais tâchi d'vos raconter l'histouaithe.

I'distchutaient un jour comme d'habitude,
Ch'tait sus l'intelligence des animaux -
Pouvaient-i' exprimer lus gratitude?
"Je maintchains qu'oui," s'fit Bernabé Duclios.

"Eh bain! En v'là ettou!" s'fit Pigeonnet,
"Absolument, tu voudrais m'faithe accraithe
Qu'i'peuvent vos dithe "mercie"? Mé, j'dis qu'nouffait,
S'tu peux l'prouver, je t'paie une fais à baithe."

"Ch'est entendu!" Comme je m'promenais un jour
Le long d'un pré dans iune de nos vallées,
Je vis une vaque qui bueulait pour du s'cours,
En galopant tout comme une possédée."

Je couothi vaie tch' est qui pouvait y aver,
Et j'vis qu'san viau s'était drotchi dans l'dou.
Un moment d'pus ch'tait seux qu'il allait s'nier,
I'n'pouvait pas se r'dêpliautchi du tout.

"Je peux m'vanter qu'ch'est pas l'couothage qui m'manque,
Sans hésiter je sauti dret dans l'ieau
Et j'dêposi en seûtheté sus la banque
Es pieds d'sa méthe le malheutheux p'tit viau."

Ch'tait merveilleux de vaie sa rêjouissance
De vaie qu'i'n'avait pas souffert du tout,
Et pis comme preuve de sa reconnaissance.
Chute pouore vaque-là s'en vint m'litchi "ettou."

S'fit Pigeonnet, "Dame ch'n' est pas êtonnant
La Vaque fut trompée par une ersembliance.
Bain seux qu'ou n'pouvait pas faithe autrement,
Sustout considéthant les circonstances."

"La chose est bain facile à explitchi.
Ch'est comme chennechin, man Bernabé Duclios,
La raison qu'la pouore bête s'en vint t'litchi
Ch'est qu'ou criyait qu'oulle avait ieu des jumiaux."

G. W. de C.