Les Pages Jèrriaises

Par Chance

Quand, au Dimanche l'arlevèe,
Tu t'promènes, sans p'pèe ni m'mèe,
Dans la ruette, l'long des fossés
Eh! N'sé pon ravie d'm'y vaie,
Par chance!

Quand i' sortent d'la chapelle,
Pourtchi don qu'les autres hardelles
S'éton'naient si tu t'en vas
L'avant, toute seule, à bouans pas?
Par chance!

Et s'tu n'rentres à la maison
Reinqu'à l'heuthe du coup d'canon,
Tes gens n'ont qu'faithe d'être gênès
Ni d't'app'ler êchervélèe;
Par chance!

Quand i' fait si bas tchic fais
Qué nou-z'a d'la pèine à vaie
Tch'est qu'y'éthait, d'bain êtonnant
Si je t'nais ta main toutt~l'temps?
Par chance!

Quand i' pl'yient à bachinées: -
Même si tu'es bain abriyèe,
Ch'est bain pus cmnmode, m'est avis,
Qu'tu veinje souos man parapluie,
Par chance!

Quand tu t'assied tout près d'mé,
Ou quand j'sommes à nos' prom'ner,
Côte à côte, bras d'sus, bras d'sous ;
Tch'est qui s' sait pus heutheux qu'nous ?
Par chance!

Quand j'sommes touos seurs, à nos deux,
Tu'éthais grand tort, ch'est bain seux,
D'dêtouanner tout l'temps ta fache,
Ou dé t'carrer si j't'embrache.
Par chance!

N't'êtonne pas si tchic séthèe,
J'vais sièz té pour vaie tan p'pèe,
A nos tout seu, dans l'parleux,
Pour lis dithe dé tchi sérieux.
Par chance!

Oh ! j't'en prie chutte séthèe-là
Trouve té souos la verandah
Quand j'veindrai à sortir d'hors
J'pouorrais passer par tan bord'
Par chance!

Et si j'té d'mandais tchic chose,
Tu t'yattendras bein j'suppose,
Et tu ne s'sas pon ravie
Si jé t'happe à ma brachie!
Par chance!

Elie

 

Viyiz étout:

 

Les Pages Jèrriaises