Les Pages Jèrriaises

Laiesse est engagi

La Porte Infé,
Octobre 14, 1897

A M. l'Éditeu de la Nouvelle Chronique.

Moussieu, - Vos pliétha t'y mertchi, sans faute, sus yeunne de vos prechainnes gazettes, qué j'soumes settlés, et qu'pus n'est besoin ès villaises ou autres filles, ou veuves, dé s'dèsrangi pour v'né rôdé autouore d'la Porte-Infé faithe sembliant d'ête à tchillyi des muothes, ou à cherchi des flieurs sauvages. Not fils Laiesse est engagi, et d'chu coup j'pense qué jé t'nons eunne fille faite au moule, ben dèshallée et èsdutchie (ou sait l'Anglyais, l'Français d'France - et tout l'monde s'met à plieuthé quand ou chante) et tchi sétha apprécié la chance qu'ou'l a d'avé 'tai r'mertchie par un Bilo.

La nouvelle qué j'vos envie s'en va, chose seuthe, dèspiété hardi d'gens d'note vèsiné; mais, ch'ès d'lus faute, y n'ont pon seu apprécié l'trésor qu'est Laïesse, ni tuos l's'avantages qu'y'avait à nos faithe buonne mine et à attriotchi not garçon. Y'avé des filles a mathié tchi l'traitaient d'buzard et d'achocre tchi maigrithont achteu ds'dèspié d'avé mantchi chute chance là, et quand vindra les neuches, ou verrez qu'l'Eglyise s'sa trop p'tite pour cont'né tout l'monde, et y s'sont toutes à s'mangi les déts d'rage d'avé laissi èscappé l'preumi prix d'la paraisse et l'honneu d'avé peut dithe pus tar' "Man bieau-pèthe l'Chantnyi Bilo." Enfin, tant pièthe pour yeux - ch'est d'lus faute, et si Laïesse mathie eunne hors-paraissienne, ch'qui n'sé vé qu'rar'ment par siez nous, ch'est qu'les filles n'ont pon seu coument s'y prendre. Laïesse a 'tai dans des maisons pour accaté d's'oeux pour mettre à coué, coumme la monniethe en est quand un jeune garçon veut dounné à entendre qui voudrait hanté eunne fille. A la plièche de lis dithe d'éntré, et d'lis d'mandé si n'éthait pon besoin d'poulettes toutes couées, coumme v'la tchi s'fait quand nou veux faithe comprendre que l'garçon pourra r'véné - nou lis disait qu'nou n'avait que des oeus d'coq.

Quand y fut eunne bordée siez Sam Défrèslé tch'a deux filles a mathié, de tchi j'nos s'saimes graies faute dé mus, pour dithe qu'il avait oui qu'sa fille aimaît les flieurs et qu'il en avait d'eunne rare sorte de tchi y y'èspèinnait ben d'la graine; à la plièche dé dithe "mercie monsieur, ma fille s'sa ben aise dé tchultivé d'vot s'menche dans san gardin et ou n'mangtha pas d'l'arouzé quand y faudra, y lis fut secqman rèsponnu qu'sa graine dé flieurs n'tait qué d'la sèrclye et qu'lus gardin n'tait pon fait pour ditet." L'puore garçon s'en r'vint tout peineux ov sa graine dan sa main et conti ses peinnes à sa memmée. Eh ben, ach'teu, qui s'liquent. Ch'né s'sa pon une St.-Ouennaise qui s'sa maîtresse à la Porte Infé, et quand vindra les neuches et lé p'tit viage dé la leunne de mi - y n'en guottont pas, d'not mi, j's'sa eunne Saint-Martinaise tch'étha toute la rueutchie.

Pus tard, si j'ai l'temps, et s'y'ou m'faites dithe qu'ou s'aimthaites à l'savé, j'vos èscrithai ben coumment la chose s'est emmanchie, et coumment j'nos y soummes prins pour dèshoutchi la nouvelle madame - ch'est madame qu'nou'z'a amor dé dithe en pâslant des Bilos. En attendant, ythaites-ous ben ov Laïesse lis montré ouès qu'nou-s accate des bagues? J'y mettrais ben tchinze ou djix huit shlings; pus tard j'vos invit'ons a vné bèthe du tée pour faithe counnaissance avec not fututhe belle fille et p't-être y'apporté un p'tit présent.

Yours truly
Bram Bilo

 

Viyiz étout:

 

Les Pages Jèrriaises