Pouor vos dithe la vérithèt, j'avais dans l'idée de vos raconter
Pouor vos dithe la vérithèt, j'avais dans l'idée de vos raconter tchiques p'tites scènes qui s'passites l'autre semaine du bord du boulevard mais j'sis d'avis qu'il faut mus que j'taisse ma becque car j'n'sais pon chein qui va en être.
Ch'est couomme dans la paraisse à man biau cliochi ou l'affaithe est bé mêlée.
Pouor Connétable n'v'la qu'est settlé mais pouor l's'autres postes j'sais bein qu'il a ieut de la marcherie à toute heuthe de nièt.
Il y en a hardi d'mârris et d'autres qui sont d'avis qu'nous s'est trop pressi. J'sais bein qu'ieun des grands d'la paraisse fut d'mande s'il tait prêt pour la poste de député.
Quant à mé j'reste ès écoutes et j'aime mus taithe ma becque pouor achteu.
J'sais bein èttout que dans une autre paraisse il y en a qui sont mârris viyant que quand ils arrivites pouor la bannie au rabais des bannelais l'affaithe était finie mais les siens qui acatites chu bannelais, viyant qu'il allait à si buan marchi, f'ront p't'être l'plaisi ès autres de lus en bailli tchique chèrges viyant que j'sis bein seur qu'ils n'sauraient pas tchi faithe de lus achat.
* * *
L'autre sé, qui faisait hardi de bliaze, j'tais otchuppée à netti les vaissiaux tandis que l'Sieur Caouain était à lièthe la gazette quand l'v'la qui s'fit:
- Marie, tu couonnais les Orange...
- Bé seur, m'prend tu pouor pus bête que té.
- De St. Brelade.
- De Séville, tu veur dithe.
- Nou fait, j'veur parler d'la famille Orange.
- Oh, tu veur dithe Moussieu l'Député Orange, de St.-Brelade.
- Ch'est chunna même. Eh bein y vint d'être choisi par vingt chinq Dames de Jerri.
- Vingt chinq femmes?
- Vingt chinq Dames, que j'te dis, s'il vos plait.
- Oh l'pouorre homme! N'v'la qui dait être pouor ses sous car y n'est pus jeune achteu, ch'est un vièr garçon.
- Ma pouorre Marie mais laisse mé te dithe...
- Que ch'n'est pon pouor chès sous. M'crais du bête touot d'même; j'sais bein ce que ch'est.
- Ch'est pon chunna en tout. Il a été choisi par chès dames pouor présenter aux Etats une pétition...
- Contre les vièrrs garçons?
- Laisse mé finir donc, chutte pétition ch'est pouor aver l'drait de siéger aux Etats.
- Mais nous peux y aller dans la galerie et j'y ai été mé même.
- N'd'vise pon tant et écoute chein qu'est mins sus la gazette:
Moussieu l'Député de St.-Brelade présente une pétition au nom de Dames demandant le droit de pouvoir se porter candidat aux élections pour Députés et ce vu qu'elles ont maintenant le droit de voter aux élections.
- Oh! ch'est pouor chunna qu'il a été chouaisi par les vingt chinq Dames et tu n'pouvais pas l'dithe devant. Ce chièr Moussieu y faudra que j'parle de ly à la couosine Trachy. P't'être qu'oulle l'invitera à baithe une tassée de thé avec lyi!
* * *
N'v'chein une p'tite scène qu'est la pure, plieine et entièthe vérithèt, fouai de Marie Hibou.
Chunna s'passi dans les temps de Noué.
Un vier compagnard s'en vint en ville et viyant qu'il tait un miot pressi y laissi son pagni siez l'bouochi tandis qui s'en allait d'un bord et de l'autre faithe chein qu'il avait à faithe.
Quant vint l'temps de prendre l'train pouor rentrer sièz ly notre buanhomme entri bé vite sièz l'épicier iou qu'il avait l'habitude d'laissi son pagni. Il tait un miot pressi et fouai de Marie Hibou il happi un autre pagni qui s'trouvait près du comteur.
Ch'n'est que le lendemain au matin qui s'aperchu de sa terrible méprinse.
Le v'la bein embarrassi car tchi faithe viyant que les boutiques étaient frumées et pouor deux jours, s'il vous pliait.
L'pire de l'affaithe ch'est que dans chu pagni qu'il avait prins par méprinse il y avait du paisson, de tchi qui couommencait à n'pon sentir de bon.
Viyant chunna, notre buanhomme déshalli l'paisson du pagni et l'douonni au cat.
Et n'v'la pouortchi que le cat fit un raide buan fricot de Noue et s'mit à ronronner de jouaie tandis que l'buanhomme s'd'mandait chein qu'nous allait penser de ly pouor aver fait dithet méprinse. Heureusement que touot l'vaisiné pouvait dithe que ch'n'tait pon l'ber viyant que chu buanhomme est du blieu ribban.
Caouain
1924
Viyiz étout: