Quand Marie Hibou ouï l'aut'e jour que le Projet d'Louai à Moussieu Renouf avait 'té adopté par une grande majorité, ou vint quâsi folle de jouaie.
“A la fin!” qu'ou s'êcriyi, “j'allons don pouver siégi dans l's Etats!”
“J'allons!” j'li raîponni, “tch'est qu'chenna veurt dithe, "j'allons”? Est-che que, par chance, tu aithais l'intention de t'porter candidat, ou p't'-être que j'dev'thais dithe, “candidate,” pour la cherge d'Député à la préchaine êlection?”
Chenna n'te r'garde par, Caouain'. J'avons prins nos m'suthes, la couôsine Trachy et mé et j'allons vos montrer chute feis qu'ou n'allez pas fouler les femmes souos vos pids comme ous avez fait dans par ichin!
Le Député Renouf est un Moussieu, dans le vrai sens du mot et iun d'ches jours quand je le rencontrethai dans l'Vier Marchi, je m'en vais li envier mes bras alentou du co et je m'en vais l'embraichi!
“Ah, le pouore E. B.!” que j'fit, “i' n'méthite pourtant pas un patheille punition. Tu finithas par te faithe enfrumer pour assaut contre un membre d's Etats, et t'faithe motchi par le public. Ou n'avez pas l'avis d'vaie don, la Caroline et té, que les membres, l'aut'e jour votithent comme i' firent simplyement parce qu'i' sont enniés d'êcouter tout vot'e tintamarre et ils ont réalisé qu'en vous donnant chein qu'ou d'mandez, i' s'sont au mains laissis tranchilles. Mais i' savent bain qu'autchunes de vous ne y arrivethont jamais dans l's Etats. Les Electeurs ont pus d'avis que chenna.”
“Eh bain je verrons don!” qu'ou s'fit, “j'ai dêja ieut assez d'promesses pour m'y mettre par une ênorme majorité! Et pis j'avons du support, sapresti! I' y a Moussieu le Lion du Mont Gommery, qu'êcrit tchiquefais sus les gâzettes, qu'est déjà à travaillyi pour nous et i' nos a asseuthé que j'y vaindrons toutes les deux!”
“Ah mais!” que j'fis, “que je n'attrape pas ch't ouaisé-là sus mes prémisses, par exemplye, ou bain je t'promets qu'i' y aitha du cârillon!”
“Je nos fichons bain d'té man pouore Caouain! Que tu l'veules ou qu'tu n'le veules pas, j'allons faithe comme bouan nos semblye!”
“Eh bain faites!” je li dis, “mais i'y a une chose qu'est bain certaine, dans l'cas que l's êlecteurs es'saient assez bêtes d'êlithe une imbécile comme té comme Député ès Etats, jamais tu ne s'sais assermentée.”
“Oh vraiement! Et tch'est qui m'en empêch'ait?”
“Che s'sait mé!”
“Et comment?”
“Tu verras comment. Tu oublies que par la louai tu ès souos l'contrôle de tan “mari,” et je n'aithais qu'à mettre objection à t'n assermentation la Cour erfus'sait de t'laissi l'ver la main.”
“Mais j'aithais les services d'un Avocat! Jack Le Cornu ne s'sait pas longtemps à les faithe êchouer tes objections!”
Quand tu aithais touos l's Avocats de tan bord ma pouore fille, che s'sait la même chose, car tout au piéthe, dès que j'ouaithais tan nom crie, je saut'tais de dans l'banc des reporters et je m'en îthais m'agenouolly en d'vant du desk au Greffyi et je lévethais la “Clameur de Haro!”
La Cour ne pouorrait pas aller contre chenna et tu pathaîtrais bain est-che pas quand le Bailli dithait: “Huissier, enlevez-moi cette femme-là!”
Je crai que v'là tchi li fit un mio peux car on n'a pas ieu justement tant d'becque à ches dernyi.
Caouain
1924
Viyiz étout: