|
Il est nai dans l'Est, à Saint-Martin, En vingt-ching, dans le mitan de Juin, Chest un grand esprit, sa vaste tête Vos dit de suite qui n'est pon bête. Y coue, dans san grand chervé, mil projets, Mais faut tout dithe, y n'êquios jamais. Je ne veurs pon dithe de li, chain qui n'est pon, Mais après tout, y faut tâchi d'avé raison. Comme esfant, chétai tout-à-s'naise Qui grimpait partout dans les fallaises, Chétai sans cesse et comme un rain Qui montait les montagnes de Sain-Martain; Nou viait qu'il 'tai, même dans chu temps, Pour monté jusqu'au tout haut du Mont-Bian; De même quand il y monti, Ne v'la la raison qui s'montri Si dêliai, au point qué vraîment Le Guide hien fit l'compliment. Che fut du haut du Mont-Bian qu'il envieit Un message de là jusqu'en Jerri, Ch'tai a ses collègues, car fallait pas Laissi en suspens les Membres d's'Etats. Non z'en êtai gênai, nou n'savai pon trop Si en montant, y s'était rompu le co. Et quant y r'vint parmi nous, y quemanchi, Car che fut de vraies conférences qu'il ouvri Le sujet, ou n'éthais pas d'peine à craithe, Etait du viage qui venait de faithe. En Jerri n'ou n'avait pon oquo réussi A avé un si buoun conférencié com' li Et pis en liézant sen histoithe y tenait Que pas un seul mot ou sylabe se perdrait. Non dizait, que ch'tai pour chela, et tout ezprès, Qui vos dizait la mème chose par vingt fais. Mais y poussait la chose au pus hien, Car la peine, pour li, n'étai en rain; Et pour expliqui et pour bain montrai, Chétai en toutes sortes d'habits qui s'mettai Un moment il étai en paysan Danubien, Et pis dans un clien, en grand Seigneur Autrichien; Mais la qu'il eu de rithe, une vraie achie, Ch'fut quant y mins une tunique de Turquie. Sans peine, et comme un Ecrivain il êcri, Il a dêjà usai des chents rames de papi, Et y n'est pas oquo a la maintchi Du grand ouvrage qu'il a quemanchi. Et de même ou pouvais bain pensé Au grand livre qu'il est à compose. En attendant pour chut'ouvrage là, J'espèth que le lecteur me permettra, Comme un exemple, pour li montrai, Chain que THOMAS WILLIAM peut racontai. Chest un rapport des pus autentiques, Il a pathu dans les deux Chroniques; En soixante-six, le douze de Mai, Au Juge GIBAUT y fut présentai. RAPPORT.A JOHN GIBAUT, Juge d'Instruction, Au Tribunal pour la Répression Des délits. Monsieur, J'vains appélé Votre attention, an fait qui m'a 'tai signalé, Chest par la rumeur publique que j'lai entendu, Car dépis des semaines non z'a prétendu Qué CONSTANT LE MAITRE et les soeurs LE Huquet Vivent ensemble dans un dézordre compiet, Et dans l'immoralitai la pus absolue, Tout le long du jour raudant et quothant les rues Et de pus, luogéant, quant vain la gniet Dans un enfonccment qu'ils ont fait Sus le versant d'une colline, Près d'la baie d'Sainte-Caterine. A Saint-Martin, en sortant de là, Le long du jour y vont faith' du mâ, Car devrai dans tout le vaîsiné Un tas de tchi a été vole. Non dit que plusieurs vols audacieux Ont étai commis (j'pense) par hieux; Sans ch'la y n'éthaient pon hieu de pain Car y ne font absolument rain. Aussitôt averti, j'décidi de prendre Des m'suthes; fallait prumièthment se rendre Pour les trouvé sus les lieux, et pour m'asseuthé Si chain que nou z'avait dit de hieux était vrai, Et pis la chose était bain difficile D'les trouvé dans un si drôle de domicile. A chut effet, hier matin, à la prumieth' lueur Du jour, j'avais avec mé le Chantgni SLATER, Et je m'étais fait aitou accompagni De Mess LE HUQUET, il était Offici. Ché n'fut pon san peine qué nou les dêcouvri Dans une Caverne profonde, pratiquie Sus le versant meridionnal, et vis-à-vis Hieunne des Gorges du Verclut, tuous quochies De mème, pêle-mêle et mêlachis. Et dans un pittoresque désordre, mais L'ensemble 'tai répoussant, même sinistre à vais. Je fus bain ravi, je n'éthais jamais cru De vais ditai dans les Gorges du Verclu. Considéthant et viyant tuous ches faits Sc les saizi, pour qui 'saient présentais, Car y faut bain tâchi de rémédié, Autr'ment l'mal vaindrai s'multiplié. Après que je l'ais eu saizies, avec la sanction Du Juge NÉE, je mins dans la prison LE MAÎTRE. Les filles à l'Hopita, Pour les empêchi de continué l'ma. Aujourd'hui j'les amaine avec mé, Pour que du tout il en sait ordonné. (Signai) ****** Le Prevnu LE MAISTRE offri Au Juge de quitté Jerri, De même y le libéthi, Et les deux filles LE HUQUET Furent minzes en libertai, Car il avait yeu bain grand tort D'les avai prézentais sus un rapport. Et bain tuous ches gens la, luougaient la gnait Dans un enfoncement qu'ils avaient fait Dans une caverne profonde et vis-à-vis Les Gorges du Verclut, y les y trouvit, et pis Quochis pêle-mêle de même si drolement, Quo tout d'abord et au prumi moment L'ensemble 'tait répoussant et sinistre à vais, En les trouvant de même tuous les trais. Chétai à la prumiéthe lueur du jour Qu'ils étaient tuous venus de même, pour Les trouvé tous dans le mitan du mal Sus la Colline, sus san versant méridionnal. Si ch'tai sinistre à vais, le récit qu'il en fait Avait sus tout l'monde un autre sorte d'êffet. Car quand le Juge l'entendait lieth', y demandait Si ch'nétai pon un roman qu' TOUMAS-WILLIAM lièzait. Ch'est bain seux, et vela qu' vos le montre, "La véthitai est pus drôle qu'un conte.” Par chu rapport la, on pouvais bain yes rendre Idaie, du livre à qui y faut s'attendre; Be rain du tout y vos fait un grand tableau, Et en main de maître, y fait de tchi très-beau. Un jour il est à vais le solai En d'sus de l'horizon a mingnai; Dans deux jours, chest par télégraphe A geva, dans l'désert, sus l'dos d'une Giraffe. Dans quicq' heuthes, il est en Turquie Pour acatai un muouché d'habits. Ch'fut dans la Gazette que j'le vi. Le lendemain il était siez li, Et je n'ai jamais peu comprendre Comment qui peut, de pays en pays d'même se rendre. Je n'ai jamais seu comment qui vain A parquothi autant de terrain; Car chest bain vrai tout chain que j'vos dis, Allais siez BAUDOUX, on verrais sa photographie, Ou l'verrais là, sus le dos D'un véthitable chameau. Au phisique, THOMAS-WILLIAM a l'air Sans s'gênai, d'être un petit mio fier; Y porte tréjous paletot et chapé, De couleur de petun, couleur brun-foncé, Et à dghix pas y vos font êternué. Un red jacket, de laine toute fine, Pour l'hivé, en guise de palotine. Un jour un amin li dit, mais Y ne faut pon dithe jamais. Y dit, je n'muourai jamais d'faim, on vihies Siez mé y yiétha tréjous des Mets-servis. Car il a tréjous 'tai pour Un raide buoun calembour. “La Voix des Îles “—(Samedi, 4 Octobre 1873.) |
Viyiz étout: