|
Mousieu, toute votre écrituze Dépie longtemps nos a fait vais Qu'ou n'êtes rain qu'un grand laiduze Qui veut se moqui des Trinntais. Pourtant quès qu'ou zavais à dize De nous ou de nos candidats ? Il est trop bouonne heuze d'en rize, Attendais qui saient ès Etats. Vos moqui de Mousieu Duhiaume, Mon vier garçon, ous zavais tort, Car il aime mue faize un siaume Que joué une gamme d'alfort. Et pie la Lanterne Magique Dit qui s'en vont joué un robeur, Mais Tom ne connait pas le pique Du carré, du tréflie ou du coeur. Et la chose sezait bain tristre De s'en aller ainchin risqui, Car qui joue ov un tait ministre Es bain seux d'être tricachi. Mais de vous et des vôtres, Savous bain qu'ou zen avais yun, Qui compazait ove les nôtres Ne vaut pas un' pipais de ptun. Maite Jean ne fait pon de grimache, Maite Jean tout seu en vaut bain deux A longue botte et longue fache, Maite Jean ne se teint pon les gveux. Maite Jean, sans crié “je seconde” Feza li de biaux longs discours, Et féza vais à tout le monde Qui n'est pas un faiseux de tours. Je siès bain seux que le grand homme Le grand craquieux du Dujardin Seza jaloux, en viant comme Maite Jean ne dit pas de gniolin. L'Anmin Flippe La Lanterne Magique 6/1/1872
|
Viyiz étout: