Nou dit qu'i' y'a des gens tch'ont pus d'sou qué d'bouôn sens, et pis y'a acouo des pathents, à chein tch'i' pathaît, tch'ont pus d'mousses qué d'bouôn sens. Par exempl'ye, les Beckhams ont donné un nom Espangno à lus nouvieau-né - Cruz.
Cruz veurt dithe "crouaix" en Espangno, et y'a tchiqu's'uns tchi craient qu'les Beckhams ont ieu l'chèrvé crouaîsi en chouaîsissant un nom d'même. Mais jé n'm'en vais pon crititchi, mé, car ché s'sait la peîle tch'appelle lé trépid nièr tchu.
Y'en a tch'ont r'mèrtchi qué Cruz est dé couôteunme un nom d'fil'ye en Espangne, car ch'est bein "la cruz", tout coumme ch'est la crouaix en Jèrriais. Mais viyant qué l'Sieur Beckham n'a pon d'honte dé s'habilyi en cotelle Orientale, ni d'mett' les drâses à sa bouonnefemme nitout, un fis auve un nom d'fil'ye n'est pon d'tchi chotchant dans chutte fanmil'ye. Et en tout cas les cheins tch'ont lanchi eune crouaîsade contre lé chouaix d'chu nom dév'thaient r'mèrtchi qu'lé nom Cruz est donné assez souvent ès garçons ès Améthiques.
J'avons des crouaix en Jèrri, nous, bein seu. Par exempl'ye y'a les dé Ste. Crouaix, et des noms d'pliaiche j'en avons un amas. La Gâzette du Sé s'trouve à La Crouaix d'Bouais, épis y'a Les Hautes Crouaix, La Crouaix au Lion, La Crouaix au Maître et acouo un tas, pa'ce qué nou soulait vaie eune crouaix à quâsiment toutes les crouaîs'sies avant la R'formâtion.
Mais pouortchi qu'les Beckhams avaient chouaîsi la forme d'la crouaix? S'il' avaient aimé mus d'aut's formes géométriques, nou-s'éthait peu ouï pâler d'Bêlong Beckham, ou Trais-Carres Beckham, ou Cylîndre Beckham. Ou p't-êt' bein Tétrapaque Beckham ou Dodécahédron Beckham, mais j'm'en doute si Dâvi et Victouaithe sont aussi géométriquement avanchis qué chenna.
En tout cas, la Missis Beckham a bein prouvé la sagesse du vièr diton: Mathyie-té ou n'té mathyie pas, ta crouaix tu porthéthas!
Viyiz étout: