Pouôrrêt'-ous d'vinner les p'tits noms les pus populaithes pouor les garçons et les fil'yes nés dans la Grand' Tèrre et en Brétangne l'année pâssée?
Pouor dé mé, j'fus divèrsément surprîns d'liéthe qué lé preunmié nom pouor les p'tits garçons en 2003 'tait Mathis. Mathis? V'là un nom qu'nou n'viyait pon du tout y'a eune dgiêxaine d'années et achteu il est donné pus qu'autchun aut' nom. Y'a don d'l'espé en Jèrri pouor not' nom Matchi.
Matthew 'tait l'nom l'pus populaithe en Irlande du Nord y'a deux ans, mais il a 'té rempliaichi à haut des rangs par Jack, tchi 'tait l'neunmétho iun en Angliétèrre et Galles étout. Mais l's Êcossais donnîtent lus pus grande préféthence à Lewis.
Pouor les fil'yes ch'tait Léa qu'nou-s'aimait mus dans la Grand' Tèrre, et pis Manon, Emma, Chloé et Marie.
À compather auve lé Rouoyaume Unni, Emma 'tait la gângnante en Êcosse, en rempliaichant Chloe tch'avait règné quat' ans en preunmié pliaiche là-bas. Chloe, lyi, avait 'té la preunmiéthe pouor sept ans en Angliétèrre et Galles, mais achteu ch'est Emily tch'est en chèrge là. J'allons-t-i' vaie don l'èrtou d'Mélie en Jèrri?
Mais tch'est qu'i' y'a auve les noms d'garçons dans la Grand' Tèrre? Né v'là Hugo en deuxième position, suivi par Lucas, Enzo, Killian et Théo. Des p'tits Nouormands tch'ont nom Mathis et Enzo et Killian? Ché s'sont les Hedleys, les Snowdens et les Ouinneteurs dé chînquante ans d'ichîn!
Geraint Jennings
Viyiz étout: