Les Pages Jèrriaises

Deux cats lus en fûtent boutitchi

Eune fais y'avait deux cats.

Ches deux cats - un cat et eune catte - lus en fûtent en Ville.

I' lus en fûtent boutitchi.

Mais il' arrivîtent en Ville trop tard.

Les boutiques 'taient freunmées et i' n'pûtent pon boutitchi.

"Ouaithe qué j'vînssions en Ville, j'n'avons pon peu boutitchi," qu'les cats dîtent.

I' décidîtent d'èrvénîn en Ville un aut' jour et d'lus arrouter d'pus bouonne heuthe.

Mais i' fûtent èrtèrgis chu jour-là et acouo eune fais les boutiques lus freunmîtent d'vant qu'les cats pûssent boutitchi.

"Dgiâtre s'sait des boutitchièrs!" qu'i' rouaûdîtent.

"J'voudrêmes qu'les boutiques saient ouvèrtes pus tard lé sé à seule fîn qué j'piêssons boutitchi."

Et les cats décidîtent d'y r'êcanchi un aut' jour.

Mais las! I' landrinnaient tant chu jour-là qué né v'là l'heuthe pâssit sans qu'les cats fîssent lus acats.

Et i' lus en r'fûtent siez ieux sans aver dêpensé un liard.

Épis né v'là Jeudi et les cats acouo eune fais à faithe en sorte qu'i'geuthîssent en Ville pouor lus boutiqu'sie.

Entréchîn qu'i' vînssent en Ville, y'avait du dro siez ieux.

Les souothis pilvâtchîtent lé beurre, lé lait fut êtrueûlé, et les cats vîntent mouoillis et n'pûtent pon lus entré-s'tchi.

Tchi pitchi! Les pouôrres cats!

Les cats lus adonnîtent sans beurre, sans lait, sans autcheune chose dans l'armouaithe.

I' 'tait d'mêtchi qu'les cats boutitchîssent, pouor bein qu'il' arrivîssent en Ville d'vant qu'les boutiques lus patchîssent.

Mais qu'il' arrivîssent en Ville, les cats fûtent ravis d'vaie qu'les boutiques 'taient acouo ouèrtes.

Ouaithe qu'i' fûsse bein tard l'sé, y'avait un fliotchet d'monde à boutitchi dans la Rue d'Driéthe.

"Pouortchi qu'ches boutiques sont ouèrtes à ces sé, ouaithe qu'i' fûssent freunmées l's aut' sièrs?" qu'i' miaûnîtent.

"Assa," qu'eune danme lus dit, "aniet ch'est Jeudi. Et les Jeudis au sé en Ville les boutiques restent ouèrtes pus tard."

"Et coumme tchi qué j'soummes vénus en temps pouor qu'nou n'eûsse pon freunmé boutique?" qu'les cats d'mandîtent.

Et la danme à r'plyitchi ès cats:

"Pouor qu'ou pûssyiz acater!"


Geraint Jennings

 

Viyiz étout:

 

Les Pages Jèrriaises