Moussieu L'Feuvre,
Je'n cré pon qu'ou connaisais ma femme, et j'en sis surprins, car ou prétend qu'ou zètes pathents; sa grand' mèthe maternelle mathy en preumié neuches un Billot d'la Ville-ès-Tublins tchété l'couosin-germain d'Nancy Bliampi la belle-mèthe à votre oncle Douard, qui moithi d'eune indigestion de vlicots en chinquante-deux. Et bin, chés pour vos dithe qué l'aute sé, j'lis liésais vot gazette, et j'li liésais qu'nos Etats 'taient en'd'sous d'lus affaithes de 4000 louis, et tchin savaient pon iou jiantre allé pour érpêtchi chu déficit dans l'budget. Quand j'li liési qué Moussieu l'Sueux voulait oquo értaxé l'iau-d'vie ou tressauti d'collèthe sus sa tchèthe, tellement qu'é-je vi l'euthe qu'oul allait trébutchi le ouachin-stan drièthe lyi. "Mès enfin," qué j'lis dis: "Mès enfin ma chièthe Nancy Sarre (Oul a nom Nancy Jane, - chès pas un ben bieau nom mais sa marraine dit tchi fallait la noumé coume chonna ou ben s'passé du pot-à-tée en argent qu'ou'l avé décidai d'lis dounné) - "y faudra ben pourtant trouvé des sous tchique bor, et pour chounna y faudra ben taxé tchique chose." "J'veux ben," qu'ou fis, "mès pourtchiq ché tréjous sus la bouésson qu'chés messieux értombe; èche tchin ya pon ôtechose?"
Là-d'sus j'nos mîsme tuos les deux à cherchi si je'n pouoraîmes pas dounné un hint à nos Etats, et, ma fé, j'cré qu'ou's'allez dithe que Nancy Jane (chés s'n'idée à lyi) a oquo du chervé dans sa caboche.
J'avais qu'menchi par proposé une taxe de chins ch'lins sus les toppeurs, més ou'm fit ermertchi tchi n'y'avé qu'les cordonniers et les rempailleurs de tchaithes tchen mettaient ach'teu, et qu'par conséquent ma taxe n'raportéthé pon gran'chose.
"Chès pas ch'la" qu'ous fit, "chès les cats tchi fos taxé." "Les câts," qu'é-je fis, "tchi câts?" "Més les câts, don; les câts et les cattes!" "Ho, ho, Nancy Jane," qu'é-j' lis dis. "j'cré qu'tuas raison d'chu cou; fos écrithe chounna tou-d'un-cou à Mousieu l'Feuvre, pour tchi'l mette dans sa gazette, pour qué not député, tchi n'a pon oquo fait gran' bri ès Etats, lus propose not' moyen d'les mettre à fliot."
Pour en fini, Moussieu l'Feuvre né'v chén ch'qué javons caltchulé... Y'en en Jerri, a l'euthe d'achteu, treize mil sept chents quarante très cas et cattes, et j'proposons qu'nou les taxe à un chlin chatchun; chin tchi f'thai siex cents quarante set louis et très chlins! Avec chès sous la, nos Etats pouoraient péyi tchiques dettes ou acaté oquo tchique maison brulée dans l'zenvithons d'la kohue, et y n'ethaient pon a értaxé chute malheutheuse ieau-d'vie pour la treizième fais ô mains.
La d'sus, bon souér; si jamais ou passais par siez nous, n'mantchis pas d'entré nos dithe "how-di-doo"; ou pouvéz vos faithe seux d'un welcome, et d'eune modjie d'cidre et d'un gobin d'fromage siez l'couesin
Flip E'rnon.
31/3/1888
Viyiz étout: