Les Pages Jèrriaises

L's XXXX-aminnâtions

Nou rapportit à ches drein qu'au Rouoyaume Unni l's examinnateurs dé GCSE en Angliais ont donné des mèrques ès candidats tch'ont fait sèrvi des gros mots dans lus papièrs. Nou n'a pon dit qu'les gros mots méthitent des grôsses mèrques, mais si les gros mots sont bein êcrits nou n'peut pon trop les crititchi s'lon les règl'yes. Tout coumme, pot d'pichi n'est pon profit sus la tête d'un offici, et l'candidat tchi voudrait sacrer et bougrer dans un test né dévthait pon espéther des félicitâtions. Sustout s'nou n'peut pon êp'ler bein des gros mots tch'ont raîque quat' lettres.

Mais viyant qu'nou-s'a annonchi à ches drein étout du progrès dans not' êtchivalent Jèrriais d'un GCSE, tchi manniéthe dé langage qué nos êtudgiants lus en vont faithe sèrvi? Car lé d'vis des gens change avaû l's années. Y'a des propos qu'nou peut liéthe dans la littéthatuthe du temps pâssé tchi choqu'thait bein des gens au jour d'aniet. Par exempl'ye, des auteurs du dgiêx-neuvième siècl'ye pâlaient parfais irrespectueusement des cheins d'aut's èrligions. Des lettres du Bouanhomme George entouor les Nièrs, publiées dans la gâzette au vîngtchième siècl'ye, éthaient 'té traitées d'racistes au jour d'aniet. Mais ch'tait l's avis des gens dé chu temps-là, quand nou s'pitchait d'honneu l'avant ès distchussions dé sexe mais nou dêrengliait sans honte entouor les difféthentes races.

Y'avait étout d'aut's tabous dispathus: les navidgants soulaient app'ler l'cliochi d'eune églyise "Lé Mèrtcheux", car ch'tait mauvais chance d'en pâler à bord. Il en 'tait d'même pouor lé pain et l'fronment, car nou rempliaich'chait ches mots en dîthant "la gângne dé Dgi".

Nou pâl'lait d'eune bête à saie ou d'un p'tit moussieu à seule fîn dé n'pon dithe lé mot "couochon" (respé d'vot' honneu). Et même s'i' fallait dithe "couochon" (respé d'l'honneu qué j'vos dai), nou dithait bein "respé". Siez les pus raffinnés, nou pâlait d'même pouor les braies (sauf vot' respé), la vèrminne (respé la compangnie) et un boeu (respé d'vous).

S'nou veurt r'chéver eune qualificâtion, i' vaut porter respé ès examinnateurs. En Jèrri, nou n'méthit'tait même pon tchînze mèrques en dîthant ès examinnateurs d'lus en aller lus faithe tchînze!

Geraint Jennings
 

Viyiz étout:

 

Les Pages Jèrriaises