D'pis la mort d'ma preumié amouotheuse, qui d'funti d'en avé trop manji des siennes qu'ou m'fit la séthée d'not' engag'ment, j'n'ai connu persounne pour faithe des crèpes si ragouotées qu'les siennes a Lonore. J'en raffole - ov d'la m'lasse, - et la chiethe èsfant s'en est si bein apperchue qu'ou n'm'en fait qu'a condition de m'hallé tchiq' chose après. Chés-tan-tchi, quand j'vit plien un jaune pliat d'bouonnes jaunes crèpes v'né sus la tabye, Dinmanche a diné, j'dit Hello! v'la des crèpes, sem-n'age! tches qu'la p'tite s'en va m'conté chutte bordée? “Sont y bouonnes, pépée? Mets y hardi de m'lasse! Prends en oquo deus-très! N'y'en reste que chinq: ch'est pas la peine d'en laissi!”
Chatchun sait qu'des crèpes fréddes, ch'n'est pon d'grosse boutique, ch'est-tan-tchi j'm'èsforchi sus les drennes, en m'renvertchant sus ma tchaise. Et pis né v'la Lonore, coumme je m'y'attendais, qui s'en vint met' san bras atouore de man co, m'tappoté la joe, et dithe que ch'est dommage qu'y n'y'en eusse oquo deus-très. “Et dit mé, ma p'tit pépée, tu devthais faithe un pliaisi a ta Lonore; un tout, p'tit pliaisi. Tu dev'thais lis dounné 15 shellings!”
Tchinze shellings! Djantre! Et ou-ès qu'tu cré que j'puche? Et pour tchi faithe, tchinze shellings? que j'dis. Et tout d'un coup j'ajouoti: Pas pour yeunne des oeuvres a ta mémée, tréjous, j'espethe! Pas pour envié des Traitées ès soudards qui sont ès Quennevais?
Par bounheu che n'tait pon pour ditet niollin qu'oul avait besoin d'sou mais j'avais quasi yeu les sangs touonnées a ch't'idée; ch'tait pour faithe tithé san portrait par un jeunne fotograffe qui vint drénment d's'èstablyi en ville.
Mais j'l'avons, tan portrait, ma chiethe, que j'dis. N'y'a oquo pon bon des mais qui pathut sus la gazette, et l'manadjeur en a yun d'enfremé au d'sus d'san scritore dan l'office; et j'counnais des gens qui font mine d'avé affaithe a lis pâslé rin qu'pour avé eunne chance de r'gardé l'portrait a ma fille. Sans conté l'sien qu'est cliutté contre la pathé d'l'imprimthie, de tchi touos l's imprimeurs otent lus chappé en passant endrét, en disant: “Good evenin', Miss Lonore!
P'tit a la faie, en baissant l's'yeux Lonore me dit que che n'tait pon tant l'envie d'avé un portrait tithé qui la pousslinait, mais que ch'tait pustot pour faithe counnaissance avec le fotograffe! Il 'tait jeune q'menchant, assez bieau garcon d'sa sorte, et oul avait oui qui n'avait persounne a coutchi pour li; qu'il 'tait souvent oblyiji d'faithe san diné sus eunne beunne et d's'oranges et béthe du tée fred. “Et pis, tu sé, pépée, ch'est un garcon d'bouonne famille; y'un d'ses onclyes a 'té quasi eslu collecteur d'aumones par deux fais, et ch'est san frethe qui tchient l'gouvernas du baté au Maître-ed-Port quand y va inspecté la tête des cauchies a mathé basse. Et les portraits qui fait sont si bieaux et si bin faits et si r'sembliants, qu'il étha bétot chose seuthe un tas d'ceusteumeurs et gagn'na des maglyes de sous!”
Ch'est ma fé bin possibye! Nous a veu des fotograffes rouolé en carosse d'vant anniet! Ches-tan-tchi j'lis baillyi ses tchinze shellings, a ma seule fille et unique héritiere, et nou verra tchès qu'en s'a. Tches qui sait! Quand chu bieau jeunne houmme la verra ma fille assise endret sa machine, sa belle robe ben èstendue tout a l'entou, sa 'pink sash,' san chappé a tasselles, ses pendants d'ouothelle, et toutes les chaînes d'or a sa mémée autouore du co - y verra d'tchi qu'nou n'vé pon touos les jours dans sa boutique! Mais je n'tchiendrais pon a ch'qui la d'mande en mathiage oquo pour tchiq' temps. J'soummes a r'gardé a l'entou d'nous; et n'faut pon créthe que j'sa pour li Lonore si j'pouvons trouvé mus.
Viyiz étout: