Au moment que j'êcris chennechin, nou vaint de m'apprendre la nouvelle qu'une malheutheuse biche a 'té tuée par des vêpres à St. Ouen.
I' pathait qu'oulle avait 'té fitchie tout près d'une vêpriéthe et avait p't-être disteurbé les mauvaises petites bêtes avec ses cônes, car i' se j'tithent sus lyi et pitchithent à un 'té dégret qu'oulle en mouothit presqu' immédiatement.
La pouore bête dut souffri tout-d'même. Ah, a, je voudrais enseigni à mes lecteurs la maniéthe la pus êfficase pour dêtruithe des vêpriéthes.
La méthode est bain simplye.
Démandez à votre apothitchi pour du “cyanide of potassium.”
Il hésit'ta peut-être à vos en douner car ch'est une bain forte pouaison, mais en signant vot'e nom et en l'asseuthant qu'ou n'allez pas l'avaler vous-même, i' pouorra p't-être vos en êpaigni.
Ayiz-en à un chelin à la fais.
V'la tchi s'sa justement assez pour mêler avec un pot d'ieau. Gardez l'mêlange dans des boutelles vain bouchies et cliuttez un label dessus avec le nom “Poison” afin d'empêchi vot'e femme ou vot'e domestique de les prendre pour du “gin”.
Quand ou trouvez une vêpriéthe ou n'avez qu'à vèrser à peu près pliain un cocotchi de vot'e decostion dans l'ouvertuthe et pas un seul vêpre ne r'sortitha, tandis que touos les siens qu'entrethont es'sont asphyxiés.
Ch'est la mort certaine pour les vêpres, et le r'miède peut s'applitchi aussi bain de jour comme de nièt.
Je counais un fermi, mé, qui, au jour d'annièt, en a dêtruit vingt-deux dans san vaisinné dans l'couothant de deustrais jours.
Sus toute chose, prenez des précautions avec le “cyanide,” car che n'est pas du “stuff” que nou peut jouer avec. I' n'en faudrait pas bain gros pour tuer un homme sans pâler d'un Caouain.
Caouain
1915
Viyiz étout: