Les Pages Jèrriaises

D'l'ûssel'lie!

Quand i' fait fraid, des portes valent mus qu'des hèches. Et ch'est bein seux chein qu'chu vièr diton nos dit: nou-s'est mus dé s'garder caud par dédans au run d'êt' hors à travailli dans les clios. Tout coumme lé travas dait continnuer tout l'mais d'Janvyi dans la Pâraisse et i' faut penser ès cheins tchi sont à asseûther nos sèrvices par les c'mîns même quand j'sommes, nous, ahonmardés siez nous, cauds coumme des mouossons à l'entou d'l'âtre (ou d'la télévision).

Nou n'vait d'aut' des hèches ès brècques des clios coumme au temps pâssé. Assa, nou-s'en vait mains entout, d'clios, dgia! Dans les touos vièrs temps nou-s'avait drouait d'hèches battantes. Ch'est en tchi nou pouvait pâsser par les hèches tchi n'taient pon bârrées à condition d'les r'freunmer driéthe sé. Achteu ch'est avaû les rues qu'tout l'trafi va, au run d'crouaîsi les clios.

Saint Hélyi est l'grand us d'l'Île. Nou-s'embèrque et d'sembèrque ès grands batchieaux à la caûchie - et ch'est les vîsiteurs tchi veinnent et les gens d'Jèrri tchi lus en vont hors pays, et l's împortâtions et exportâtions étout (véthe, j'n'avons pon, à Saint Hélyi, l'aéroport, mais, pouor dé mé, ch'est lé p'tit us qu'est chenna!)

Et quand nou r'garde nos bâtisses, les us sont d'grand întéthêt. Y'a des maîsons tch'ont d's us Georgiens êlégants auve des montées, des pédiments et des colonnes ou pilièrs; des portes ès grandes boutiques; lé porta d'l'Églyise Pârouaîssiale, lé chein d'la "Cathédrale", et d'aut's; l'entrée d'la nouvelle P'tite Cour est modèrne mais împressionnante; épis y'a d's us modestes tchi muchent eune maîson ou eune caûminne rensatchie driéthe tchique côtchiéthe. Et à la campangne y'a d's arches dé tchique vielles fèrmes.

N'mantchiz pon nitout l'înscription sus la vielle porte du Musée dans lé C'mîn d'la Caûchie: "Fier coum Cyrus, mes viers garçons, j'vos ouvre l'us, l'us d'ma caumine".

Lé mais d'Janvyi prend san nom d'Janus, lé dgieu Romain d's us, et chu mais-chîn est l'pas d'l'us d'l'année. En entrant en l'an 2011, tch'est qui nos atchil'ye? Tchi qui sait tch'est qu'est driéthe la porte?

Geraint Jennings


 

Viyiz étout:

 

Les Pages Jèrriaises