Tape à l'us, Cllement! tape à l'us!
Pour mei de tei, je n'en veurs pus;
Crei tu, ma fei, que pour tei pllaire,
J'êcout'rai trejous ten niolin?
Va-t-en, va-t-en, marche ten k'min:
Tu n'as pon qu'faire de me siere.
Che n'tait que l'aut' jeu que j'tei vi
Tel pourjaulant auv' la Nency;
Tu faisais d'charme à ten idèe:
Mais tu peux ach't-heu conter d'sus,
Que quand je t' ouvrirai men us,
L'affaire s'ra bein ramendèe.
Quand tu s'rais Prince ou fils de Roué,
Ou q'tu-érais dirigi la loué,
Ma parole n'en s'rait que toute iune.
La girouette au haut du cllochi
Ersemblle bein à t'n-amiéqui;
Tu change autant d'feis que la Lune.
Les biaux p'tits mots, les jolis d'vis,
Sont-i des faits, ou bein des dits
Pour faire mine de vos pllaire ?
La farce est par trop bouonne à jouer,
Quand nou n'y veit ni bllanc ni neir .
Pour de mei, j'en counais l'histouere.
Tu montres bein ten grand esprit,
Et tu fais bein - tu'en as si p'tit -
D'en faire un divers êtalage.
Capuche accouo en êquerbot;
Tape à l'us, Cllement, coume en fo:
Crei-tu que tu-en d'veindras pus sage?
A. A. L. G.
|
