L'pus souvent, chu rêve est tout dêslotchi
Et prend la victime qui n'dort qu'à maintchi
- Et quand nou s'rêville, ma fè, nou n'sait dghèthe
Si chu fichu rêve est vision ou plièthe,
Ch'fut là l'cas d'trais hommes, tchi, sus la Rocco,
Faillidrent mouothi d'peux - ils en trembl'yent oquo!

Ch'tait un jour que l'temps n'tait pon trop bé;
I' tchiyait d'la plyie et parfais i' ventait,
J'taimes quatre à pêtchi des louoches et des vras;
La pêque était p'tite, et ch'la n'mordait pas
De si piètre happe à la fin j'menn'yi
Et j'file sus l'rampart, laissant l'sautres au rotchi.

J'resti là tout seu' tant que j'pu y stenné
Mais j'y perdais man temps et j'grélottais d'fré;
J'décide de r'descendre et d'm'en aller vaie
Tch'est qu'mes parchonniers, de lus bord, faisaient
Mais j'fus êtonné, quand j'en apprechi
D'les vaie tous ensembl'ye rouollés sus l'rotchi!

Tch'est don' qui y'a yeu? tch'est qu'ches trais là ont?
Tch'est qu'est lus idée et tch'est don' qui font
D'même, en rouelle de tchan, catinant la pierre,
Faut-i' qui s'saient fos d'rester ventre à terre.
Un jour comme annièt et du temps qui fait?
Mais i' faut qui r'dottent, faut lus faithe un brait!

J'lu criyi lus noms, à l'un et à l'autre,
I' lus l'vidrent douoch'ment; et, comme des apôtres,
Lus mindrent à g'noux et qu'menchidrent à hicter
A gémir, à s'pliaindre, à suer, à trembl'yer!
Lus faches 'talent hallées et lus yeux, grands ouverts,
Inditchaient combein qu'ils avaient souffert.

Quand i' fudrent enfin assez rêvill'yis
Et que j'vi qu'ils 'taient un mio pus rassis,
J'lus d'mandi la cause d'la peux qu'ils avaient
Et d'tchi sorte d'rêve est-qu'i' s'émôtchaient?
Ne f'chin la rêponse qu'i' m'fidrent touos les trais
Et i juthent qu'oul 'tait absolument vraie.

"Ammin Ph'lip, êcoute, je v'nons d'vaie un vra
"Qu'est gros coumme une tonne et fort coumme un gh'va
"Qu'a des dents d'dragon et un musé d'boeu
"D'z'êcalles coumme des pelles et des yiers de feu
"Et jamais autr' paisson n'a yeu d'itelles d'ghinnes
"Nou-z-en f'thait des velles pour une brigantine!

"Le v'ra s'en est v'nu ichin tout près d'nous.
"A fait sen possibl'ye pour nous em'ner tous
"Avec li, au large, jusqu'au fond d'la mé;
"Et d'une seule bouochie - dans un seul mouoché -
"I' nos éthait tous, sans sifaiches, crotchis
"Et pour san soupé, nos éthait mangis!"

- Ches trais pouorres baloques, de même effrités,
Prenaient des rêves pour des réalités!
Chein qui pensaient être vra grand et gros
N'était qu'un mio d'vraic qui fliottait sus yeau...
- S'i' n'avaient pon 'té à lus jougue sans cesse
I' n'éthaient pon yeu - rève, peux ni Ponceraisse.

PH'LIP D'LA GOLARDE