Dans l'temps de la Fontaine aut' fais,
Jusque les petits paissons paullaient
        Mais pour achteu, viyions,
        Y n'font qu'craûlé lus coue,
        Quant y vaient lus maître
        Au matin paraitre,

		Riant et tout fi,
		Au bord du vivi,
		Avec du bian pain
		Dans sa propre main,

Pour lus dounné; et pis les tuous gros
Y les fiatte tout duouch'ment sus l'dos;
Quand nou les fiatte, pas à r'bours pé,
Y ne cherchent pas à s'écarté;
Mais s'ils 'taient fiattais sus l'autre sens,
Ben vite y montrétheaient lus dents,
Et féthaient laie meinne damne -
Justement coumme le jeune "Tom."
Un jour chétai tard dans la sétheaie
Quand les Offices furent brûlaies,
Les siennes à Captaine ERNON,
Dessous les boies, nou n'y viait pon,
Et elle fut là que le jeune "Tom"
Donni unne terrible vaunne
A chu puoure Mousieu MESSERVI;
Il en resti, mais tout étourdi,
Et si n'avait pon étai bein prompt,
Il éthai 'tai quochi tout sen long,
        Avec sa gaue coppaie en d'sous d'l'hy,
        Ch'tai ben triste à vais, que de li;
        Hieunne des grosses dents de devant
        L'avaient coppai nette jusqu'au sang.
        Il eu grand ma, chétai pas des teurs,
        Et il y mins du stickin'-plasteur.
        Au prumièthe abbord nou criyi
        Qu'il en restétheai tréjous mertchi
        A vais les merques nou zétheai creu
        Que ch'tai fait par les cornes d'un boeu.
        Tout chonchin n'était qu'un accident
Qui eu lieu dans la Kache de Diélament;
        Mais vla qui dounne lieu à pensé
Que "Tom" n'est pas trop tendre à rencontré!

Vla qui s'passi coumme j'men allais
Au feu! yiavait un fiotchet de tchans
Qui appartenaient à plusieurs gens,
Qui s'n'allaient aitou au feu pour vais.
Yien avait d'autres, mé je le sé,
Qui chercheaient quicq' chose à sauvé.

Captaine ERNON perdit de tchi
Qui ne fut pon brûlai siez li!

Pour ervenin, yia un tas de tchans
Qui bagoulent hardi d'temps en temps.
L'autre jour, en sortant de man creux,
J'en rencontri deux qui m'firent peux,
Ch'tai au Car'four, auprès de JEAN L'SUEUX;
Je m'en venais au raide buoun trot
Par la route qui vein du Puchot;
J'avais tai du Buoulai, par l'Tas d'Geon,
J'en étais quâsi à bu de vent,
Et je m'en allais pour ertuounné
Par siez HENRI au haut du Buoulai;
Ne vla la tuounnaie que j'fais au sé,
Quand jen'veurs pon bein hien mêcarté.
Dans des temps j'vais par tout l'vaisiné,
Pour vais chein que j'puourrais bein trouvé.
Hieun étai bein GROS, l'autre 'tai haut,
Au tout fins mains, coumme un buoun viau;
En ergardant, y m'sembli que' j'vi
Qu'ses gambes pliaient un mio suous li;
En l'êcoutant, j'trouvi qui paullai
Des biaux et long discours qui faisait;
Y paulli aitou de sen couezin,
Qui fait tuous ses discours en latin;
Et je comprins, par tous lus dévis,
Qui demeuthe à la Bouctéthie.
Je les entendi, et y disaient
Qui faisait aitou des biaux versets
Dans la gazet', il avait êcri,
Chétai pour picangni MESSERVI.
(Et qu'il avait signai
Libéral-Avisai.)

Je fis minne de cherchi pour quicq'chose,
Afin d'pouvé les êcouté unne pose;
        Le pus haut dît au GROS - "tu n'peux pon
        Remporté dans chutte êlection,
        Et y faut mus renvié le balo
        Sus l'dos à Mait' PHILIPPE CABO.
        Mais damme! chest ben seux tu verras
        Que Maite PHILIPPE n'y s'cea pas,
        Et il en attrapthea de belles,
Car y le pican'nont pour la Bagatelle;
Et pis pour des cigares, l'temps passai j'avais
        Toute l'histoithe au bu d'mes daigts.
        Dans unne élection PH'LIP eu tort,
Y prins des cigares et y s'en fut déhors,
Toute unne bouaietaie, y fut les distribué
A unne tchéthue, là ou ils 'taient à tuounné.
Y lève le coud', et pis y bé
Autant,coumme nou veurs yien dounné.

Pour quant à GEORGE BENEST
Eh bein! y n'est pas mauvais;
Mais Captaine BIAMPI dit
Qu'il est trop d'ov MESSERVI.
Pour l'playground il avait votai
Aitou pour qui fut akatai!!
J'lérais ben continuai dans l'Coumité d'Taxation,
Mais de nos gens, les siens de Rozé ne voulaient pon.
(Et pis y ne faut pas oubliai,
Y mantchi à me demandé;
Si l'avait fait,
Y yiétheai 'tai.)
Chest chounna qui nos a enbêtaie
Et j'en attraptheons unne rossaie.
Si l'affaithe continue je s'theai obligi,
Oquothe unne fais, de changi de parti
Car en changeant (men peupais et mé), j'avais creu
        Avé la pièche qu' NORMAN a achteu.
        Jen' voudrais pas que chela l'y s'ceai dit,
        Mais ch'tai maugrai mé que j'voti pour li,
        Et j'en avons tuous un ben grand pitchi
        D'vais coumme MESSERVI s'en est moqui.
        D'avé PITEUR SOHI à yiaidghi,
        Je n'en disons rein dutout, mais je crains
        Que plusieurs de nous n'en pensent pas mains." -
        Et pis je dounni un buoun fort saquet
        A un os qu' j'avais justement trouvai,
Et vla qui fit un si fort brit,
Que l'haut balocq' par sus l'fossai m'vit;
Y me dounnirent la pour-chasse,
Coumme s'ils étaient des tchans d'chasse.
Mais j'en eu bétôt raison,
Car le grand ne pouvait pon
Quoure, l'GROS veint tout buoun'ment,
Dans p'tit d'temps, à court de vent.

Et tout de suite, je vins à vais
        Qui ne quotheaient pon coumme aut fais
        J'saute par sus l'fossai, j'les guetti
        Un p'tit d'temps, et le grand s'arrêti
        Dans l'carrefour ès Croies, je pensi
        Me v'la ben sauvai, et chest qui faut
Que j'tâche de sauté dans la fosse à eaux
        Après quicque temps, je réussi
A les passé, et dans la fosse je sauti
        En êcoutant, je vins a savé
Que chétai d'un dîné qu'ils étaient a paullé -
        - Le grand était tout à fait ravi
En pensant coumment que Mousieu avait agi
        Viant que Maît' JOS. BIAMPI chanti.
Y contaient que l'insulte tai un mio pour hieux,
        Car che ne fut que entre lus deux
        Qu'ils avaient réussi a avé
        Mait' JOS a se levé pour chanté.
        La chanson ne le pican'gnait pon,
Et Mousieu n'avait pon dutout raison
De s'en allé, coumme un tchen fuoutai.
Un vrai Mousieu n'étheai pon fait ditai;
Et les gens s'en moquent, - je le fetheais
Mé même aitou (s'fît l'grand) si j'oseais,
Car pour un rein, y vein à s'mâri,
Chest damme ben triste que de li.

		Après chounna, j'entendi quicq' mots
		D'unne Gazette ès Ecrehos,
		Disant que jusq' ichain nou criait
		Que ch'tai du travas au vieir PINÉ,
		Qui passait sen temps à imprimé ;
		Mais depis quicq' temps non la watchi
		Y n'a pas dutout sorti Jerri
		N'on n'ganne rein de le'biaûmé.

        Y n'va pon ès Ecréhos imprimé

		Quoique, se disaient ti, y criaient,
		Qu'il aidgait entuours les versets
		Car y ne peut pas vos paullé.
		Sans être tréjous a rimé.

Tuous les deux étaient bein d'accord, que pour li, au mains
Y devtheai s'borné es affaithes de Sain-Luoutheains!

        Dans tout l'temps que chonchein s'passait
Les t'chens es vaisins ne faisaient que de ouassé,
Le grand né, à CHARLES MATHET s'abannounit,
Et auprès de la fosse y veint pour senti.
        J'avais grand peux que petêtre
        Y veindrait a mercounaitre;
Je quothi par "La Porte," puourai nou l'craithe
Le jeune Tom gronnait raide sen biau-pèthe
Je l'entendit dithe tout haut qu'il avait veu
Un tas de tchi, qui yiavait fait grand ma au tcheu!

Quand j'entends du bri de famille
Chest que je couors vite, je file.
J'tais ben lassai, quand j'veint a rentré
Dans men creux, dans le fond du Buoulai.

Ma fé chest ben êtonnant,
Coummest qui ya des grand-gens,
Quand ils on d'tchi à counté,
Quand y se craient diversement malins,
Et qui passent aitou coumme ben fins
Y devtheaient ben ergardé
Que le vieir tchan du Buoulai
N'sait pon à les êcouté.
Car dans bein des êlections, les fossés
Ont des ouotheilles, coumme les patheaies.

Wha! Wha! Wha!!

Lé Tchan du Bouôlé