Le Tchan tchi n'paie pon de taxe

Hi! escoutais-mé unne minute, buounnes gens,
J'ai deux mots à vos dire, sus la taxe des tchans;
Nou dit que le Connêtable, avec sa Police,
Ont (le tout ensemble) djiantrement de malice;
Qu'i guettent chaque personne, tchi garde un tchan,
Et y les font dépauté ben dêliêment,
Lus piêche d'êchu - (un louis pour un lévri),
Dvant le prumi jour du mois de Févri.
S'nou manq'a payi, chest unne autre affaire,
Y vos double la taxe, v'la chein qui yia d'pière,
Eh bein! v'la qu'est tout bein, ch'est selon la loué
Toute personne dévrait, en buounne foié
Avé, en buon temps s'n'êchu ou ben sen louis
Pour le tchan qui gard', vais la taxe payie!
Not Chef Municipal se crait des pus fin,
Et avec chonna, diversement matin,
Et cré chi n'dévrait pon, dans toute la paraisse,
Yêcappé un seul tchan, car y né laisse,
Personne en r'pos, tchi n'aient dêpautai,
Pour lus tchan, chein qué la loué a ordonnai.

Mais yia un grand tchan, chest qui se fiche ben de'li,
Y se proumène quand y veurt, et il en a du git.
Car quand veint l'mitan de' la nièt,
Quand Mousieu est quochi au lièt.
Y veint ouassé et grondre, sus les " trais gris cats,"
Tchi sont faits en chiment; car y né prétend pas,
Que Mousieu,par auqun droit peut avé,
Ditai, (foié d'tchan) cluttai sus sa paré.

Y gibbe lé baloque, y s'en moque, y saute de joie
Et sé dit, "Si chétai des tchans jé té pardonnerais.
Mais quand j'y vait des cats,
V'la qui né mé va pas;
Et si je les tenais,
Je vos les craquerais;
Sans (ma fingre en faire un mio de cas!!)
Après avé ouassai,
Tout le long de la gnièt,
Le matin apres chonna;
Dans sa niche y s'en va.
Tout riant
Et craulant,
D'fiertai tout chain qu'il a dé coue;
Et pis se moquant,
D'Monsieu en disant,
Jé mé fiche pas mal de vous;
Jusq'ichein, janmais dé ma vie,
J'nai hieu de taxe d'payie,
Et je n'en pairai pon,
Pour unne buounne raison;
Ou la serais bein, parcéqué j'vos la dirai
Je né sis pon autre qué lé "T'CHAN DU BUOULAI! "

Lé Tchan du Bouôlé

Viyiz étout: