|
Jé vai les Îles Saint-Marcou dans la baie, la tou dé Tatihou et la cauchie. À san tout seu, au mitan dé la mé, né v'là un cormouothan sus san rotchi. Et coumme des plieunmes dé mauve tch'êcrivent en mé d's histouaithes dé viages tch'ont 'té, tchi sont à v'nîn, lé rotchi est la tchaîse au nièr ouaîsé à prêchi les p'tits couothants du destîn. Si les batchieaux à vailes sont à êcrithe, nièr coumme un accent sus eune lettre d'grannit, l'ouaîsé compose eune élégie d'navithe pouor touos les dispathus et naûfragis. I' prêche, lé cormouothan sus san rotchi: la baie - sa chapelle, et ses bancs - les louêmes. Lé seul cantique qu'nou ouait est l'cliapotis et l'ieau est changie, et ch't êtrange baptême nos nettit. Ch'est lé pays à Saint Marcou tchi, y'a longtemps, attriotchit Saint Hélyi... avant les mauves, la tou dé Tatihou, et même lé cormouothan sus san rotchi. Geraint Jennings Saint-Vaast-la-Hougue 11/8/2002 |
Viyiz étout: