J'sis d'avis qu'nou n'peut pon compather la souffréthie d'au jour d'aniet d'auve la glouaithe qué j'têmouongn'nons à l'av'nîn. Toute la criâtion est entchéthinnée dans l'espé d'vaie appathaître les fis dé Dgieu. Toute la criâtion a 'té pouor êmotuther, pas par sa natuthe en lyi-même mais par l'chein tchi l'a souômîns, en espéthant qué toute la criâtion s'sa libéthée du pouvé d'la mort et châr'ra en libèrté la glouaithe des êfants dé Dgieu. Jé savons qué jusqu'achteu toute la criâtion ensembl'ye a 'té à plieuther et à lamenter dé ma. Ch'n'est pon raîque lyi mais, nous-mêmes tch'avons les preunmié frits d'l'Esprit, j'sommes abattus en espéthant l'heuthe quand jé s'sons atchilyis coumme des fis, ch'est en tchi l'salut d'nos corps. En espéthant j'éthons l'salut, mais l'espé qu'nou vait n'est d'aut' l'espé, car pouortchi espéther chein qu'nou vait? Mais si j'espéthons chein qué jé n'viyons pon, j'pouôrrons enduther. D'même l'Esprit souôtcheint la fouaiblièche dé nos tchoeurs. Jé n'comprannons pon coumme tchi prier Dgieu, mais l'Esprit dit d'eune manniéthe îndîthabl'ye chein qué j'éthêmes voulu dithe. Et l'chein tchi dêcouvre les s'grets des tchoeurs connaît l'avis d'l'Esprit en priant pouor les cheins tch'aiment lé Bouôn Dgieu.
Car j'ai l'asseûthance qué ni la mort ni la vie, ni l's anges ni les pouvièrs, ni les choses d'achteu ni les choses à v'nîn, ni la hauteu, ni la profondeu, ni autcheune aut' criatuthe né s'sa capabl'ye d'nos s'pather dé l'amour dé Dgieu tch'est en Jésû-Christ, not' Saûveux.
Viyiz étout: