Aimez, et n'mentez pon. Détestez l'ma, et pensez tréjous au bein.

Coumme des fréthes, aim'-ous; et considéthez l's aut's avant vous-mêmes.

Dans vot' travas, n'séyiz pon pièrcheurs; mais en sèrvant l'Seigneur séyiz âpres dans l'esprit.

Séyiz heutheurs dans l'espé, pâtients dans la diffitchulté, et dêvoués dans la priéthe.

Donnez tout chein qu'i' faut ès saints; èrchévez l's êtrangièrs siez vous.

Offrez des bénédictions ès cheins tchi vos offrent des cruautés: offrez-lus des bénédictions à la pliaiche dé malédictions.

Rêjouiss'-ous auve les cheins tchi lus rêjouissent; plieuthez auve les cheins tchi plieuthent.

Séyiz en harmonie l's iuns auve les aut's. Né criy'-ous pon trop înmportants, mais allez siez les gens ordinnaithes sans faithe dé san tchian.

N'èrdonnez pon l'ma pouor lé ma - à pèrsonne. Faîtes tout coumme i' faut ès ièrs dé tout l'monde.

Si ch'est pôssibl'ye, d'meuthez en paix auve tout l'monde.

M's anmîns, i' n' faut pon penser tréjous à vos vengi; laîssiz chenna au Bouon Dgieu quand il est mârri contre lé ma, coumme ch'est êcrit:

Ch'est à mé la peunnition et la rêcompense, dit l'Seigneur.

Mais si vot' enn'mîn a faim, donnez-lî à mangi; s'il a sé, donnez-lî à baithe, car en faîthant chennechîn ous allez pitchi eune fouônnée d'tchèrbon sus sa tête.

Né séyiz pon vaintchus par l'ma, mais vaintchiz l'ma auve lé bein.