Les Pages Jèrriaises

Les pouques et lé pôqueur

L'pus souvent quand j'fais ma boutiqu'sie, j'porte ma pouque à dos - ou si j'sis sus ma bike, j'prends man bîssa d'bike - à seule fîn d'pouver dithe au boutitchi qu'i' n'est pon nécessaithe dé m'donner eune pouque en pliastique. Au jour d'aniet, si nou va dé boutique en boutique en ville, nou peut collecter un amas dé pouques en pliastique à patchi des choses tch'ont 'té dêjà patchies et r'patchies dans du carton, du papi et d'la pliastique. Tchi paqu'sie!

Quand j'tais êtudgiant en Russie (et chenna avant la tchête du commeunisme), j'soulais acater d'la flieu et d's oeufs pouor faithe des mèrvelles - véthe, j'faîthais des mèrvelles en Russie même si j'n'avais autcheune idée des mathées là-bas dans l'mitan du continnent. Et dans la boutique nou m'donnait eune pap'sée d'flieu et même eune pap'sée d'oeufs. Èr'mèrtchiz bein, eune pap'sée d'oeufs, pas eune poutchie ni même eune boêtée. Et, en êffet, nou pouvait donner des pouques en pliastique dé d'dans des supèrmarchièrs du Vouêst coumme présents car i' 'taient si rares là-bas temps pâssé.

Êtant assez janne, j'înmaginne qu'ichîn en Jèrri étout, temps pâssé, nou r'chévait des pap'sées dé choses dans les boutiques. Véthe-dgia, j'avons lé mot pouor chenna!

Mais ach'teu y'a des pouques en pliastique à touos les bords - j'sis oblyigi parfais d'însister qué jé n'veurs pon dé pouque en pliastique et les boutitchièrs dans les grandes boutiques à m'explyitchi qué j'dais atchilyi eune pouque pouor qué nou n'm'arrête pon coumme un voleux dans la boutique!

Ach'teu lé conmèrce modèrne paque tout - et l'èrpaque et l'èrpaque même eune traîsième fais. Et d'èrtou siez sé, i' faut pitchi hors toute chutte paqu'sie-là. Ch'est-i' vraînment eune bouonne chose dé produithe, transporter et dêtruithe tout chu papi, tout chu carton et toute chutte pliastique? Nânnîn, car ch'n'est pon la miyeu chose pouor not' envithonnement.

En en pitchant hors des poutchies d'pouques y'a tchiques jours, j'sentais un brîn d'nostalgie pouor les feurs d'ma jannèche. J'aim'thais-t-i' y pitchi ches pouques!

 

lé fou d'la boulangu'thie

 

Quand j'tais mousse, j'soulions aver un bein grand feu en hivé. Jé m'souveins du bouais, du tchèrbon et des vielles gâzettes du sé qu'nou faîthait sèrvi pouor èrgraie l'feu - et des chendres auprès qu'nou patchait dans des gâzettes pouor pitchi hors. Mais nou-s'ajouôtait l'carton, l'papi et la paqu'sie en pliastique étout. À Noué, les p'tits buts d'pliastique couleuthée tchi patchaient nos chucrîns y 'taient brûlés étout - et les cruques des nouaix, et tout ch'qu'nou pouvait brûler pouor caûffer l'appartément.

Les tranches dé pain qu'nou rôtissait d'vant l'feu sus des frouques avait un goût feunmé - et les fliambes tchi dansaient à l'entou du papi qu'nou m'ttait sus l'feu, tchi l'litchaient et tchi lé d'vouothaient d'un co auve eune grande brûl'lie, bein, né v'là du fanne pouor un mousse!

Et y'avait toute la pêque pouor lé feu étout: lé pôqueur, les t'nailles, la brînge et la pelle. La jaune tchuivre lithait dans la lueu du feu et y'avait d's èrfliets quâsiment vivants.

Mais l'feu 'tait utile étout, pa'ce qué nou caûffait l'appartément en brûlant chein qu'nou n'voulait pus. À la pliaiche dé pitchi hors les papièrs, les boêtes, et la paqu'sie, nou les m'ttait sus l'feu. Y'avait mains à pitchi dans l'bostchot - excepté, bein seu, les chendres patchies dans eune vielle gâzette.

Ach'teu, auve lé caûffage êlectrique, l'ênorme âtre en grannit n'est pus fait sèrvi coumme d'amors. Et ch'est pitchi, pa'ce qu'i' faut faithe tchiquechose auve toutes ches fichues pouques en pliastique!

 

Geraint Jennings

 

Viyiz étout:

 

Les Pages Jèrriaises