Comme ou l'savez, j'n'ai pas tréjous 'té serieux dans mes lettres. La pliupart des fais ch'tait parsque j'voulais aggraver la bouonnefemme tch'avait fait ou dit tchiquechose tchi n'm'avait pas pliut, mais étout tchiquefais ch'tais parsque je n'tais pas dans l'humeur.
Mais, à ces sé. Moussieu, j'm'en vais être sérieux, car, pour pâsler franchement, la Merrienne et mé, j'sommes bein lyien d'aimer l'appathence des choses. À qu'menchi y'a l'grand projet d'dêpenser une immense somme sûs l'développement du Fort Regent. Nous pâsle de deux millions, et chonna à un moment que l'Président des Finances n'pouvait pas sanctionner l'achat d'la caux qu'les fermiers veulent pour lûs tèrre, parsqu'i' dit qu'i' n'a pas les sous. A-t'on jamais ouï d'une telle îmbécilité?
Bein seux le Fort restétha ouèsqu'il est pour bein d's années, pour deux raisons: Si ch'est un comité d's Etats tchi s'en va entreprendre les travaux i' f'tha banqu'route dans bein p'tit d'temps et, secondement, les sous ne s'sont pas là en autchun temps.
La Merrienne, ayant liut l'rapport dans la gâzette, voulit saver pourtchi que l's Etats avaient r'fûsé d'fouer le Fort à yun de chais syndicats ou compagnies pour un terme d'années, car ou comprend, et mé étout, que y'éthait yeu tout-d'suite de bouonnes offres d'ichîn et là, et l's Etats s'saient tchitte de toute responsibilité. Ou considéthe que ch'est un acte dé folie.
“Et mé étout, Merrienne,” j'li dis, “mais si tu veur la vraie raison, ch'est parsque l's Etats craignent que chais êtrangièrs veindraient bétôt d'mander un casino et au moment nos Etats n'veulent pas ditet dans l'île.”
“Avec raison,” out dit: quant à mé, j'sais raide contre, et té étout, sans doute.”
“Véthe,” j'm'accordis, “mais i' veindra quand même, et i' faut s'y attendre. Tu'as veu chein tch'est proposé pour le Fort - un grand hôtel, de belles boutiques, des ascenseurs pour aîdgi ès touristes à monter et descendre - mais j'n'ai veu autchune mention d'une églyise ou d'une chapelle. Y'éthait tout plyien à bèthe et à mangi pour nos visiteurs, et sans doute de concerts et d'la mûsique, mais au dînmanche pas d'services par chein que j'en ai veu, Et, pourtant, ch'est un comité d'Jêrriais tch'a présenté chu rapport à la chambre."
"Ch'est vrai, Ph'lip," ou dit, "et j'trouve chonna bein triste. Pense un mio à l'êtat d'choses dans notre jeune temps, quand dans les chapelles i n'y avait pas un banc de viède le dînmanche au sé, et que touos l's hommes se trouvaient là au matîn, quand lûs femmes 'taient à prépather l'dîné. Y'avait djais-huit chapelles Méthodistes, et ils avaient toutes bouonne congrégation.”
“Chais temps-là sont pâssés, ma vielle,” j'li dis, “et i' ne r'veindront pas. À djais ans d'ichîn - et i' faut aussi bein l'admettre - i' n'restétha en Jêrri que les Catholiques. I' restéthont car i' n'ont qu'une religion et ou n'change jamais, tandis qu'les Protestants en ont tant que nou n'peut pas les conter.”
La Merrienne réflechit pour une pôse, épis ou mînt bas les cauches qu'ou 'tait à rac'moder et dit qu'ou n'm'avait jamais veu si sêrieux et qu'ou criyait qu'oulle avait un bouon r'miède pour l'îndigestion. Ou dêshallit la boutelle et m'donnit un bouon lèrmîn de la méd'cine qu'ou cont'nait, et dans chînq minutes j'viyais les choses un mio pûs couleur dé rose. Une tâsse de tais n'éthait jamais yeu ch't èffet-là!
Ayant avalé deux-d'goûts étout, la Merrienne se mînt à pâsler d'la situâtion financièthe, et dit qu'ou criyait p't'être que l'Cyril Lé Mèrquand l'avait peinte un mio pièthe qu'ou n'tait. “Après tout,” ou dit, “après touos chais visiteurs que j'avons yeu et les sous qu'les fermiers sont à faithe avec lûs tomates, i' dait y'avait ocquo tchiques sous dans l'côffre-fort.”
“Ch'là s'peut,” j'li dis, “mais avec chonna, j'crais que notre Cyril est réellement gêné chutte fais. Touos les comités dêpenseurs semblent craithe que le côffre-fort n'a pas d'fond et ch'est seux et certain qu'à la fîn du mais, y'en étha plusieurs tchi s'sont desappointés. Je n'crais pas que la situâtion a jamais 'té pûs sérieuse. I' faut que l'Cyril aie l'même couothage et la même résolution comme l'Chancellyi en Angliétèrre, et dans un an ou deux la situâtion étha bein amendée.”
“I' faut attendre à vaie,” ou dit, “mais, Ph'ilip, es-tu ocquo d'la même idée concernant l'êlection pour Connêtablye en Ville? Tu'avais dit la s'maine pâssée que tu n'criyais pas que l'Sieur Ryan avait hardi d'chance.”
“Si j'pouvais craithe chien qu'nou m'a dit d'pis,” j'li dis, “j'éthais à craithe tch'i' n'en a pas du tout, mais que si l'Député Bathette avait prînt il éthait yeu une moyeu chance, car ch'est un bouon Jèrriais d'la vielle trempe, d'une bouonne famille jêrriaise, et il avait fait un excellent Chantgni. Mais j'té dis tout simplyement chien qu'j'ai ouï, et n'étant pas villais, je n'si pas pûs întérrêssi qu'chonna. Ch'est à la Ville dé chouaisi, et s'ou n'fait pas un bouon chouaix, qu'ou s'râmasse."
La bouonnefemme 'tait en train de se l'ver quand ou d'mandit si j'avais ouï pâler des 'shows' d'bêtes. N'étant pas ocquo en santé ou savait que j'n'en avais pas veu yun, mais ou criyait que j'avais veu tchique amin qu'avait peut m'donner un mio d'informâtion.
“Tu'as raison”, j'li dis, “et je r'grette pûs qu'jamais à ch'teu que je n'pouôrrai pas aller au 'show' d'l'île, mais comme tu l'mais, man docteu insiste que je n'si pas ocquo assez bein, et je n'peux pas l'contredithe. Tout ch'que j'espèthe ch'est que quand l' m'enviêtha san compte, i' ne s'sa pas trop prêssi pour ses sous, car au moment j'ai comme lé Cyril Lé Mèrquand - ch'est-à-dithe, j'n'ai pas grand moyen.”
“Ne t'gêne pas,” ou dit, “j'avons yeu d'pièthe temps et j'sommes ocquo ichîn. Mais tu n'm'as pas dit chien que tu'as ouï. Par exemplye, tchèsqu'i' en va gâgni l'championnat des vaques?”
“I n'savait pas,” j'li raiponnis, “mais i' m'dit que les 'shows' à les prendre yun dans l'autre, avaient 'té raide bouons. Lé miyeu dans s'n opinion, 'tait l' 'show' des Trais Pâraisses, à Saint Piêrre, et l'pûs faillyi, St. Jean et St. Louothains. Quant au championnat, i' n'éthait pas voulu gagi tchi ne s'sait pas gâgni par une g'niche r'nouv'llée tch'il avait veu dans l'Ouest. Chein tch'est certain ch'est qu'y'étha comme dé couôtume, des mêssieurs l'tou du 'ring' tch'i' dithont que y'a des juges dé bêtes et des bêtes dé juges.”
Ph'lip
1961
Viyiz étout: