à Portinfé, St. Ou.
Vendredi au sé.
Moussieu l'Editeu,
Comme de couôtume, je qu'menche par pâsler du temps, tch'est, comme les femmes, variable d'un jour à l'autre. Chais jours nou n'peut pas s'fier d'sûs, même pour une heuthe, car i' peut être bé l'matîn, et l'contraithe l'arlévée. L'autre matîn, la Merrienne, profitant du bieau solé, s'en fut dans san gardîn pour tchillyi des flieurs pour envier au Vièr Marchi d'main au matîn par la bus pour aidgi à décorer chein qu'nos fermiers et d'autres éthont contribué en honneur du grand jour tchi, touos l's ans, rappelle à la mémouaithe les valeureux jeunes aviateurs tchi gâgnitent chein qu'a tréjous 'té app'lé la Battle of Britain et, en l'faisant, donnîtent lûs vies. Mais ou fut attrappée dans une achie tchi la trompit jusqu'à la pé dans mains d'une minute. J'la fis mettre ses pids dans une toube d'ieau, avec tout plyien d'moutarde, épi ou fut s'couochi. Ou n'en fut pas d'pièthe, car oulle est duthe, ma bouonnefemme.
J'avons veu par la gâzette que l's Etats ont à la fîn appointé un nouvieau Chef de la Police des Etats. Y'avait un grand nombre d'applitchants, et sûs un sens le Sieur Johnson (ch'est là san nom) peut s'compter chanceux, mais, avec toute sa longue expéthience, i' n'a jamais rencontré la Police Honorifique tch'i' s'en va trouver en Jèrri. Sans autchune doute, i' trouv'tha parmi les Connêtablyes, les Chantgniers, les Vingtniers, les Officiers du Connêtablye et tout l'restant de bein drôles de caractèthes.
Le préchain mais je r'venons ès heuthes normales, ch'est à dithe que chein qu'nou-s-appèle l'heuthe d'êté s'sa fini pour une autre année et la leunmièthe dispathaîtra une heuthe pûs vite dans l'arlévée. J'n'en avons jamais approuvé, la Merrienne et mé, de chutte heuthe d'êté, mais je n'sommes pas comme l'ex-Chantgni Poch, tchi d'meuthait aupi d'la chapelle Eden, à Saint Sauveux, et tchi entrait tréjous dans san banc comme le prédicateur prononcait la Bénédiction. Comme chonna, i' n'avait pas à mettre dans la collecte. San ardgûment 'tait que les jours d'la s'maine avaient 'té fixés dans l'temps d'la fondâtion du monde, et que y'avait sept jours à châque semaine tous d'la même londgeur et que l's hommes n'pouvaient pas changi les heuthes. Et après tout, y'a tchiquechose à dithe pour chonna.
À ch'teu', Moussieu, de touos les candidats pour le poste de Sénateur, pouv-ous m'dithe tchèsque-i' s'en va y v'nîn, car la Merrienne et mé j'voulons voter pour les miyeurs, si j'pouvions saver tchèsqu'i' sont? Sans doute, i' faut ocquo attendre pour le jour d'la nominâtion. Mais ch'est seux que certains des candidats sont un mio nerveux, car ils ont yeu hardi d'promêsses et i' savent par chein tchi s'est arrivé dans l'pâssé que chonna n'vaudra p't'être pas grand'chose le jour de l'élection. Y'en a par exemplye, tchi se r'souveindront d'la fameuse élection à Saint Sauveux quand le grand John L'Amy, se faisant seux d'au mains chent-quarante vouaix, en r'chut exactement septante-sept. Et nou-s-a veu hardi d'autres r'sultats ocquo pûs suprênants, tchi n'taient pas en accord avec les promêsses.
Le préchain mais y'a étout le grand show d'bêtes à Springfield, et j'm'attends d'vaie tchiquechose de raide bouon dans toutes les clâsses, mais partitchulièthement dans les jeunes vaques et les g'niches r'nouv'lées. Ch'est l'dernié show de l'année, et nou peut s'faithe seux d'une belle collection. J'espèthe de pouver y'aller et r'venîn. J'ai décidé d'aller bein douochement avec les raffraichissements, car au mais d'août j'en prîns pus qu'assez, et l'préchain jour je n'me trouvais pas bein. Aut'fais, Moussieu, j'pouvais bèthe avec le préchain, mais au jour d'agniet si j'veur me garder même moyennement sobre, i' faut que j'prenne des précautions.
I' n'faut pas que j'oublie d'vos raconter chein tch'arrivit à la Merrienne avant hier, quand ou s'mînt dans la tête de d'valler à l'Etâ pour pêchi une crabbe ou deux. Eh bein, Moussieu, ch'n'tait pas la Merrienne tchi prînt une crabbe, mais une crabbe tchi happit la Merrienne! Oulle avait à peine mînt ses pids dans une mathe qu'ou fut attrapée par le gros ortet de san pid gauche et, n'pouvant pas s'dêfaithe de la créatuthe, ou s'mînt à heurler de toutes les forches d'ses poumons - et j'vos asseuthé, Moussieu, que quand ma bouonnefemme se met à heurler nou peut l'entendre d'un but! Ou fut libéthée par des vraitcheurs, et ram'née ichîn tout s'en long dans l'fond d'un hèrnais. Heutheusement, oulle avait mînt ses grôsses bottes, ou à ch'teu' ou manqu'thait un gros ortet, et sans doute éthait d'la peine à marchi. Même s'il est vrai que j'avons par bordées nos p'tits desagrèments, je n'voudrais pas vaie ma bouonnefemme estropiée pour l'restant d'sa vie.
Ch'est tout pour agniet, Moussieu, et don ch'est pour la s'maine tchi veint.
Ph'lip
Viyiz étout: