Je n'sis pas laid, bein du contraithe
N'y'a pas pus bé, j'vos di de l'craithe,
De m'en vanter I n'faôut pon l'faithe
Mondoux, je sis à plliaindre.

Et je sis fort, coume un capeste,
Et manigat, n'y'a pas pus teste,
Quand je m'y mets, sans blouse ou veste -
Pourtant je sis à plliaindre.

J'en sai bein long, je peux chiffrér
Billets du "Bridge" j'peux caltchuler,
Même en "centals" sans me tromper.
Mais ah! je sis à plliaindre.

Je peux m'suther, la terre dêfouie
Et dithe bein vite, combein d'vrégies
Y'a dans l'maînage, même jusqu'ès pids,
Pourtant je sis à plliaindre.

Je peux cachir la grand' tchéthue
Avec huit ch'vaux, liés ès batchus,
Persoune au monde ne peuvent faithe mus,
De vrai je sis à plliaindre.

Ch'est "Hu" et "Ouague" et "Bidéouais,"
S'ous m'entendaîtes, j'ai unne bouanne vouais
Aussin les ch'vaux raidissent lus traits
Pourtant je sis à plliaindre.

"Je sais parler" en bon Français,
"And talk with you" en pur Anglliais,
Sans oublier not' vier patouais.
Ah mais! que j'sis à plliaindre.

Et pis ov' tout j'ai bein viagi.
J'ai tet en Sercq et en Aur'gny,
En Ecreho et Dgernesy,
Toutefais je sis à plliaindre.

D'un biau maînage, j'sis héthitchi,
Car j'sis le grand de Bram Vautchi,
Et de tout ch'la j'ai grand ordgi.
Mais dam' je sis à plliaindre.

Et mus de tout j'ai un bouan pèthe
Et coume j'adore ma puor' vielle mèthe,
Ettou daeux soeurs, et un p'tit frèthe.
Criyoux, je sis à plliaindre.

J'ai un tas d'sous, rein ne me manque,
J'en ai siez nous, et à la banque,
Pas coume un ouaisé sus la branque,
Ah vèthe, je sis à plliaindre.

J'avons des rentes, I'en a biau faithe
Et assignables, et des foncièthes
Et d's'hypothèques s'ous voulez m'craithe
Tout d'maîme, je sis à plliaindre.

J'avons des vaques, j'en avons six,
Sept ou huit viaux et unne brebis,
Des bêtes à saie unne racachie -
Je sis, je sis à plliaindre.

Coume ous viyiz, j'ai des lunettes,
Car ch'est la mode, I faôut qu'j'les mette,
Ch'est Mess Hettich qui les a faites,
Tout d'même je sis à plliaindre.

J' ai un bâton et parapllyie,
Pour me couvrir des grandes achies,
Ov' san biau cro I fait envie.
Bon sens, je sis à plliaindre.

J'n'aime pas la bièthe ni le "Whiskey"
Mais donnez me, "Port" ou "Sherry,"
Rein qu'un lermin, du p'tit bathi.
Mon doux, je sis à plliaindre.

Mais tchi peut battre le jus d'la poume?
Ne m'pâlais pas de tout vot' Rhoume,
Le cidre pour mé doune un bouan soume.
Tout d'même je sis à plliaindre.

J'vais à l'Egllise bein redjulli,
Tuous les Dinmanches pour ouïr préchir
Notre Recteu, que j'aime hardi.
Pourtant je sis à plliaindre.

J'sis collectaeux et j'fais la tchête
De banc en banc, et dans la bonaîte.
Je mets man ch'lin, et pas d'sornettes,
Toutefais je sis à plliaindre.

J'vos ai conté ma position,
Tout me souorit, n'y'a pas d'garçon,
Qu'est mus que mé - mais j'ai raison,
De dithe que j'sis à plliaindre.

Pourtchi ches plliaintes, pourtchi ches pllieurs,
Pourtchi ches geins, pourtchi ches sueurs.
Pourtchi crier tréjous malheur.
Pourtchi? Car j'sis à plliaindre.

Faoût-i vos l'dithe? l'avons d'v'iné?
J'n'ai pon de femme - Et v'la l'sécret.
J'en voudrais ieunne, j'vos l'dit tout dret,
Est-che drôle que j'sis à plliaindre.

Quand j'pasle ès filles, I's'mettent à rithe,
Et j'perds la tête, et n'sait tchi dithe,
"Ecris unne lettre," j'n'veurs pon écrithe -
Bon sens, je sis à plliaindre.

Trouvez m'en ieunne, j'vos en supplie,
Jane ou Mary, Anne ou Julie,
Et j'mé craithé l'reste de ma vie,
Que je n'sis pas à plliaindre.

"ROSEVILLE."