Ah! PHILIPPE LE VESCONT'
Tu dev' thais ruoghi d' hont';
As tu perdu tout l'respé?
Nou s'en a chôse pour té.
As-tu oublihait, faut 'i té le rappélé,
La Brebis à Ancel, le cauffre à Miss Piné?
Penses-tu au Rât de John Perchard,
Aux trais ans dé Maît' Josué?
Y'en avait deux dé Ph'lip Hoquard,
Et combain de Sa Majesté?
Les intéthais escarmoutez
D'la Pâraiss' en pien' A'sembiée.
- - Non, non, jé né mens pon,
Démand' à Ph'lip du Biau-Vallon.
Pour ervénin à la Brébis:
Chest Charles dé la Bouctéthie;
Dans l'êlection il 'tait l'piéthe
A en raconté tout l'histuoithe.
I' faut l'avai d'li, d'prumièth' main,
Hi la dîsait avec réfrain.
Car pour li, quand il est séthieux,
Il est com' mâri, i'n ri pon,
Hi fait laid, à en faithe peux.
Hi peut perdre une êlection
En faisant deux ou trais tuonnêz.
Quand nou n'est pon dé s'n'opinion,
Hi vos dit, tout cru, ou mentez.
Sur les Côtils pour un moment
Ils 'taient pour voté autrement.
Sus Jean Palo, il en dîzait;
Quiq' dro, un' farce s' était passèz,
Par rapport au p'tit John d' Rozé,
Près du Buolaï, sus les Huthèz.
Hil en faisait un tas de faun;
Hi faisait craith' qu'in' savait pon
Qué chétait sus la campagne,
Dans les terres d'la Vil' Machon;
Hil tait mâri, il avait 'tai
Mins à l'amend' pour san fôssai.
Hi mettai tout sus l'co
Dé Mait' Jean Palo
Hi l'nommi "Bismark," hi disait,
Qué comme li il 'tait fait d'fé.
BALOQUE,
d'la Houle-ès-t'chens.
|
