J'apprîns hardi tard à aimer les ouaîsieaux ,
J'l'èrgrette un mio
Mais achteu tout est arrangi
Nou s'est comprîns
I' n's'otchupent pon d'mé
Je n'm'otchupe pon d'ieux
J'les èrgarde
J'les laîsse faithe
Touos les ouaîsieaux font d'lus mus
I' mènent à la belle hèrbe
Mais i'n'donnent pon l'exempl'ye comme par exempl'ye Moussieu Gliachi tchi s'est condit d'eune faichon ermèrtchabl'ye et tchoeuthue duthant la Dgèrre ou l'exampl'ye du p'tit Paul tch'était si pauvre et si bé et tellement honnête auve chenna et tchi d'vînt pus tard l'grand Paul si riche et si vièr, si honorabl'ye et si affreux et si rapinneux et si charitabl'ye et si pieux ou par exempl'ye chutte vielle servante tchi eut eune vie et eune morte exempliaithe janmais d'distchussions pon ch'na janmais d'distchussions auve Moussieu ou auve Madanme à propos dé ch't'âffreuse tchestchion d'gans
Nânnin
Les ouaîsieaux donnent l'exempl'ye
L'exempl'ye coumme i'conveint
Exempl'ye les plieunmes les ailes lé vol des ouaîsieaux
Exempl'ye lé nid les viages et les chants des ouaîsieaux
Exempl'ye la bieauté des ouaîsieaux
Exempl'ye lé tchoeu des ouaîsieaux
La leunmiéthe des ouaîsieaux.
Jacques Prévert
Vèrsion Jèrriaise Mariane de Bondy
Octobre 2003.
Viyiz étout: