Harriett

Oh mais Piteur ! Que tu ès un mauvais garcon !

Piteur

Bon ! et pourtchi chenna ? Tch'est qu'j'ai fait ?

Harriett

Tu as aîraichi le nid d'rouoge-gorge qu'était dans l'fossé au bas du gardin !

Piteur

Eh bain! Tchi ma qu'i'y a là d'dans ? Les autres garçons en aîraichent bain, ieux !

Harriett

Ch'n'est pas là une extchuse ! Si les autres garçons sont des mauvais p'tits sujets, tu n'as pas besoin de suivre lus exemplye. Tu sais bain que pepée t'avait dit qu'i'n'fallait pas aîraichi des nids d'rouoge-gorge, que ch'est des p'tits ouaisiaux qui n'font pas d'ma à rain, mais qui dêtruisent les vers dans les gardins. Y avait'i d's'oeus dans chu nid-là ?

Piteur

Nennin, ch'tait des p'tits qu'i'y avait.

Harriett

Oh, ch'est oquo pièthe ! Faut-i qu'tu sais un p'tit traître ! Et tch'est qu'tu en as fait, des p'tits ?

Piteur

Je l's ai donnès au cat.

Harriett

Oh, man p'tit vilain, 'je m'en vais l'dithe à p'pée et tu t'en vas être bain puni !

Piteur

Je criyais que ch'tait un nid d'mouaisson, et qu'i fallait l'dêtruithe. Pepée tithe bain des mouaissons dans l'hivé, li !

Harriett

Tu ès un mensongi ! Tu sais bain que des mouaissons ne font pas lus nids dans les fossés et pis quand-même, tu avais bain veu la p'tite rouoge-gorge quand oulle 'tait à couer sus san nid.

Piteur

Eh bain, je l'fis sans penser, et si tu l'dis à pepée et que j'sis puni, ch'n'est pas chenna qui ramèn'na les p'tits ouaisiaux.

Harriett

Mais pourtchi être si cruel ? Penses comment que memmée et pepée es'saient affligis si ch'est qu'i r'venaient d'la ville tchique jour et trouvaient la maison emportée et que j'aithions 'té tués et mangis par tchique mauvaise bête !

Piteur

Oh, mais ch'n'est pas la même chose chenna.

Harriett

Si fait ch'est la même chose. Quand ches p'tites rouoges-gorges-là ont trouvé lus nid aîraichi et autchun signe de lus p'tits, ils ont souffert tout autant comme pepée et memée f'thaient.

Piteur

Eh bain ergarde, Harriett, si tu n'dis pas a personne chein qu'j'ai fait je t'promets de n'jamais aîraichi un autre nid, ni de prendre les oeus ès p'tits ouaisiaux.

Harriett

Bain seux ?

Piteur

Vaithe bain seux, je te l'promets.

Harriett

V'là un bouan garçon !