Les Pages Jèrriaises

Nombres

Chapitre 6, vèrsets 24-26

Qu'lé Seigneu env'yie sa bénédiction sus té et t'garde; qu'la lueu d'la fache du Seigneu lithe sus té et qu'i' t'faiche grâce; qu'i' t'èrgarde auve s'n accord et qu'i' t'bâle sa paix.

 

Chapitre 11, vèrsets 4-10

Lé râqu'nas tchi viageaient acanté ieux avaient eune grande envie, et l's êfants d'Israël èrplieuthaient et dithaient, "Tchi qui nos donn'na d'la viande à mangi? J'en litchons les babinnes quand j'ramémouaithons l'paîsson qué j'soulêmes mangi en Êgypte pouor rein, et les cocombres, et les m'lons, et l'pouothé, et l's ouognons et les châlotes... mais achteu j'sommes flias et j'en sommes dînné d'chutte fichue manne-chîn!"

Chutte manne 'tait coumme d'la graine dé coriandre et pus à co pèrlée d'couleu. Lé monde ravaûdaient pouor la tchilyi, épis la moulaient atout un moulinnet ou l'êglianmaient atout un mortchi, épis la bouoillachaient dans eune chaûdgiéthe et en griyaient des gâches; et l'goût en 'tait coumme lé goût d'gâches à hielle. Quand i' tchiyait d'la rôsée sus les tentes la niet, la manne en tchiyait étout.

Moïse ouïyait coumme tchi qu'lé monde gronmachaient d'même dans lus fanmil'yes, châtchun à l'us d'sa tente. Et l'Seigneu en 'tait f'lé, et Moïse étout 'tait bein mârri.

 

Chapitre 16, vèrset 35

Épis l'feu êcliatchit du Seigneu et brûlit les deux chent chînquante hoummes tch'offraient l'parfum.
 

Chapitre 17, vèrsets 7-8

Moïse don pliaichit les bâtons l'avant au Seigneu dans la tente dé l'alliance. Et quand Moïse entrit dans la tente dé l'alliance l'matîn du préchain jour, êv'chîn l'bâton à Aaron, l'bâton d'la maîson d'Lévi, avait flieuthi et 'tait couèrt d'bourgeons et d'flieurs et d'almandes.

 

Chapitre 20, vèrsets 7-11

Et l'Seigneu dit à Moïse, "Prannez la badgette, té et tan fréthe Aaron, et rassembliez tout l'peupl'ye, et coumme i' vos r'gardent, c'mandez au rotchi d'bailli dé s'n ieau, et ainchîn halez dé l'ieau dé d'dans l'rotchi pouor ieux, et abrévez l'peupl'ye et lus bestchias."

Et Moïse prînt la badgette d'avant au Seigneu coumme i' lî c'mandait. Épis Moïse et Aaron rassemblyîdrent lé peupl'ye l'avant au rotchi, et i' lus dit, "Êcoutez-mé achteu, vous dé tchi les tchoeurs sont dêtouônnés du Seigneu: j'allons-t-i' haler dé l'ieau pouor vous dé d'dans chu rotchi?" Et Moïse l'vit sa main et tapit l'rotchi deux cos atout sa badgette, et dé l'ieau en vèrsit et l'peupl'ye et lus bestchias lus en abrévîdrent pouor en êt' rassâsiés.

 

Chapitre 32, vèrsets 23-24

Mais s'ou n'faites pon chennechîn, ous êtes des pécheurs contre lé Seigneu, et ou s'sez asseûthés qué vot' péché vos dêmuch'cha. Bâtissez don des villes pouor vos p'tchiots, et des bèrgéthies pouor vos brébis, et faites chein qu'ous avez dit.

 

 

Viyiz étout:

 

Les Pages Jèrriaises