- "Tu t'moqu' dé mé, panfêqu' qué tu-ès;
"Ah! coum' j'n'en f'rais ni deux ni trais -
"Tu dai l'savé - si jé trouvais
"Moyen dé t'envié hors ma vais..."
- "Et, ma fille, i n'y-a rain d'pus aîsi -
"Coyrons vite au ras du vivi:
"Jé m'tchiendrai d'but tout-près du seau, "
"Et, té, d'ta forch' pouss'-mé dans l'ieau...."

- "Mé dis-tu chonna tout-à-bon?"
Erplitchit vit' Maitress' Manon.
"Jé sis sérieux - j'té l'jur' ma fé!
"Jé sis prêt d'y d'cendre à-ch't-heu ov' té."
I s'en fur'nt touos deux au vivi;
"Mais," s'fait Miston, "j'oublyons d'tchi:
"Và cherchi eun' cord' pour mé lié
"Les mains, car j'pouorais m'êcapé.... "

- "L'idèe est bououn' - j'n'y pensais pas,
"Qué tu-érais peu t'servi d'tes bras...."
- Ou dêcampit en hât' cherchi
La cord' pour l'empêchi d'nagi.
- "Ah! en v'chin yeunn' qui f'ra l'affair'....
"Qué j't'amarr' les mains par drièr',"
Criyi Manon, en apréchant
Dé s'n-houm', qui faisait lé trembliant!

"Tu trembl'.... Tu-as peux, jé pens', grand vieau?
"Tu-ès coum' lé ca qu'aprèch' dé l'ieau!
"Allons! tandis qu'tu-en ès d'avis,
"Qué j'amarr' tes herchots, vier gris!"
Les mains d'Miston fur'nt liè's bain-du.
"Jé veux," dît-i, "qu'tu m'pousse un bu."
- "Tu-éras du run à varvotté,
"Car j'm'en vais m'avolé sus té!"

Manon 'rtchullit pour s'êlanchi,
Mais s'n-houm' la viyant apréchi,
Fît deux pas d'côtè, èt-pis yi -
Ou s'cliatchit en long dans l'vivi!.....
Ou s'débatit - fît des rouaux d'fé -
Et criyit: "Oh! j't'en prie, sauv'mé!..."
-"Ah! j'en sis bain dguéri, Manon,
"Car tu m'as liè les patt's.... ' " dît Miston!

EPITAPHE sus MANON.

Ichin gît Manon,
La fenme à Miston,
Qui, au r'bours dé san souhait,
Sé vît mouori tout-à-fait.

Un jour j'couorais pour fair' du ma
Et j'gagnis pus qu'un bain;
Car j'avallis tant d'ieau par là,
Qu'ichin, jé n'ai pus d'faim.
Si j'n'avais pas couoru sus l'vi
Pour y-ôté la vie,
Jé n'érais pas thiès dans l'vivi
Et n's'rais pon enfouie.

J. D.