Bouônjour, bouonnes gens. Ch'est Geraint Jennings tchi vos pâle aniet dans un cèrtain accent. Mais tchil accent qué j'ai? Chenna dépend d'la langue dans tchi qué j'pâle. Nou-s'a dit qu'en pâlant l'Jèrriais j'ai un accent dé Highlands – ou pouvez décider vos-mêmes.
Ch'est en tchi, j'm'en fus dans la Grand' Tèrre y'a tchînze jours auve l'êtchipe du Tourisme dé Jèrri pouor la lanch'chie là-bas des célébrâtions 1204-2004. Mé. j'tais là pouor pâler du Jèrriais ès journalistes et explyitchi en Français un mio l'histouaithe dé huit chents ans d'pis la s'pathâtion d'la Grand' Tèrre. Y'avait un întéthqet dans l'Jèrriais et des gens à m'dithe qu'i' n'avaient janmais réalisé qu'les Jèrriais avaient eune langue – mais y'en avaient deux'trais tchi r'mèrtchîtent mén accent en Français, et chenna pas pouor la preunmié fais, nou m'a dit qu'mén accent Français est pustôt Cannadgien.
J'n'ai janmais 'té au Cannada, mais i' sembl'ye qué j'ai un p'tit accent Jèrriais en pâlant Français tchi fait penser à un accent Tchubecouais – tout coumme, les cheins tchi dithent qu'les Jèrriais ont un accent Sud-Afritchain en pâlant Angliais.
M'n accent Angliais, j'éthais dit, est pustôt d'l'Angliais d'estuaithe, coumme à la télévîsion – mais y'a des gens tch'ont dit qué quand j'sis à pâler entouor les bikes, et ou savez qué j'pâle des bikes bein souvent, lé mot bike à un accent Jèrriais.
Nou sait qué j'pâle d'aut's langues qué ches'-chîn et s'ou m'êcoutez quand j'pâle en Russe, ous èrmèrqu'thêtes sans doute mén accent du Sud d'la Russie. J'êtudgis là-bas à l'Unnivèrsité d'Voronej. Voronej est eune grande ville d'eune million d'gens à mié-c'mîn entre Moscou et Volgograd où'est qu'nou prononce un g dans la gorge coumme chennechîn gh. L'ex-Président d'l'Unnion Soviétique, Mikhail Gorbachov veint du Sud d'la Russie, li, et il a étout un accent du Sud. Quand i' tait acouo au pouvé avant la tchête du Commeunisme, i' tait populaithe dans les pays du Vouêt – mais i' tait mains populaithe en Russie. Pouortchi?
Assa, ses politiques dévîntent pas populaithes, mais s'n accent n'lî prêtait pon hardi d'confianche. I' faut comprendre qu'les Moscovites et les Russes du Nord et d'l'Êst ont eune înmage des cheins du Sud tchi n'est dgéthe complyimentaithe. Les gens du Sud né sont pon honnêtes, nou n'peut pon aver confianche en ieux, i' sont des voleurs.
Mais, un accent d'l'Êst, d'la Sibéthie, coumme lé chein à l'ex-Président Yeltsin, donne l'înmage dé tchith'un tchi n'fait pon d'teurs, tch'est ouvèrt et tchi dit chein qu'i' pense.
La s'maine pâssée un rapport fut publié au Rouoyaume Unni entouor chein qu'les directeurs dé compangnies pensent des difféthents accents Britanniques.
Un accent Êcossais sîngnifie tchitch'un tchi travâle dû, s'lon 40% des rêponses, mais seulement 9% craient qu'les cheins auve un accent d'Liverpool travâlent dû.
Un accent d'l'estuaithe sembl'ye înspither eune cèrtaine confianche mais un accent Londronnais dé cockney né l'fait pon: 16% des directeurs craient qu'les cheins auve ch't accent-là sont mains honnêtes qu'les aut's.
46% des directeurs dithent qué ch'est un d'savantage qué d'pâler auve un accent régional – ch'n'est qu' 7% tch'avaient rêponnu qué ch'est un avantage.
Et achteu, tchiques annonces:
Lé nouvieau neunmétho des Nouvelles Chroniques du Don Balleine a appathu – lé thème du magâsîn chutte fais est l'sport et les gammes. Y'a d's articl'yes èrpubliées du Caouain, dé Ph'lip et Mêrrienne et d's histouaithes, poésies, gammes et quiz.
La Fais'sie d'cidre à Hamptonne est l'25 et l'26 d'Octobre. Ch't' année, l'Héthitage dé Jèrri a organnîsé eune compétition d'poésie app'lée “Pomme Poème”. I' veulent aver des poésies en Jèrriais sus l'thème des pommes et des pommièrs. Ou pouvez êcrithe des poésies étout en Angliais ou en Français. Mais vot' poésie dait arriver siez l'Héthitage dé Jèrri avant lé 21 d'Octobre. Y'a des détails sus l'site d'Ithangnie d'l'Héthitage dé Jèrri ou autrément contactez Julia Coutanche au Mûsée d'Jèrri.
Et l'weekend auprès chenna, y'étha la Séthée d'Nièr Beurre d'L'Assembliée d'Jèrriais.
Assa, bouonnes gens, lé S'tembre est vraînment arrivé – mais il est temps pouor mé dé tchitter. J'vos souhaite eune bouonne sémaine. Et mèrcie bein des fais pouor m'aver êcouté.
11/10/2003
Viyiz étout: