|
Laïesse et mé j'étions jeunmieaux D'eune èrsembliance hardi visiblye; Dé fache et d'membres comme deux d'gouts d'ieau - J'étions comme iun, si près qu'possiblye! Ch'tait embêtant, tout d'même, valet, Car iun pour l'aut' j'tions souvent prîns; Nouos gens mêlaient Laïesse et mé - Ah danme, j'tions comme deux p'tits lapîns! Les preunmié jours en nouos lavant La fichue gardgienne nouos mêlit, La même bêtise fut faite, dans l'temps Pus tard quand l'minnistre nouos nommit! Mais toute ma vie j'ai 'té vengi - Mes peines c'menchîtent quand j'tais tout p'tchiot, Man fréthe 'tait mé et mé j'tais li - Hé, j'avais bieau crier haro! Si j'avais faim - ah danme, noufait, Nou 'tait bein seux d'souongni Laïot! Ch'tait tréjous li qu'en profitait - Même quand j'voulais aller sus l'pot! Si iun d'nouos deux tchique dro faisait Laïesse 'tait seux d'en remporter; Et si par malheu i' piaillait J'tais seux cèrtain d' êt' talmousé! Quand i' fallait lî torchi l'nez I' s'sauvait bein vite auve lé sien! Assa, ou m'craithez s'ou voulez, I' m'happaient, ieux, et m'torchaient l'mein! S'i' fallait prendre d'la méd'cinne Ch'tait mé sans doute tch'était appelé, J'êcopissais, faisais des grinnes - Man fréthe Laïesse sé motchait d'mé! Mais j'eus ma r'venge, dgia, eune bordée, Jé n'tais pon bein, j'avais l'corps dû! I' fallait, prendre des p'tits boulets - Hîn, hîn, ha, ha! Laïesse les eut! Nouos v'là à l'êcole touos les deux, Hélas, mon doue, j'tais pas finni! Viyant qu'man fréthe 'tait roupilleux - Combein qu'j'en ai 'té quétilli! D'la même hardelle jé d'vînmes êprîns, Stèr mé chouaisit et j'm'engagis; Boufre, pus tard tout fut dêmîns, Chose èrmèrquablye - l'aut' la mathyit! D's années auprès, dgiâtre sait tout, J'tions en commèrce, châtchun pour sé, Et j'faisais bein, mais touos les sou - Laïesse èrchévait tout pour mé! Eune fais étou quand il 'tait souard Qu'il assonmit l'chent'nyi d'St. Ou, I' vîntent mé qu'si lé sé, tout tard - Sans pus d'affaithes i' m'mîntent au cliou! Et toute not' vie ch'a 'té mînséthe (Par eune mêprînse dé nouos pathents!) D'aver 'té nés jeunmieaux et fréthes Et d'aver vêtchu si longtemps! Tout est finni, ach'teu, pour bouon - Criyiz-mé ou né m'criyiz pon, L'aut' jeu j'mouothis d'un coup d'solé Et l'pouorre Laïesse fut enterré!
|
(Chennechîn dait êt' înspithé par la poésie Angliaîche “The Twins” par H.S. Leigh.)
Viyiz étout: