Tchi jouaie d'èrvaie les bieaux mais d'Juîn et d'Juilet! Des mais quand nou veurt dêjutchi à seule fîn d'jopînter et jouarôler et faithe lé jacques; des mais tchi promettent du solé et du ji et des longues séthées. Auprès la Saint Jean, nou-s'attend fête les vacanches - s'nou va au Japon, en Jamaïque ou s'nou reste en Jèrri.
Y'a bein d's amouotheurs tchi lus mathyient au mais d'Juîn, s'lon la couôteunme, pouor lé bonheu. Dans les touos vièrs temps, Junon, la reine des dgieux Romains, donnit san nom au mais. La déêsse 'tait la patronne étout des mathiages, et né v'là sans doute l'originne d'la couôteunme des neuches au mais d'Juîn, sénon qu'ch'est l'preunmié mais conv'nabl'ye auprès la pliant'tie du R'nouvé.
Nou dit étout qu'lé nom Junon veint d'la même réchinne qu'lé mot "janne", et qu'driéthe les deux patholes y'a l'idée d'la naîssance, d'la jouéyauté. Véthe, lé mais d'Juîn est un mais tchi rajannit et quand la jannèche peut aller l'j'va l'trot.
Lé mais d'Juilet fut r'bâptîsi en honneu d'Jules César - un mio coumme not' Césarée tch'a nom en Latîn Caesarea. S'lon eune vielle légende, Jules César fit un partage dé l'Île entre douze dé ses généthaux. Ch'n'est dgéthe probabl'ye, car eune douzième d'eune p'tite île n'est pon un don génétheux pouor un génétha! Y'a des doutanches en tout cas pouor latchelle des Îles d'la Manche avait nom Caesarea au temps d's empéreurs Romains. Ch'fut raîque bein des siècl'yes pus tard qu'nou fitchit l'Île à chu nom-là, en criyant qu'la pus grande des îles méthitait l'nom du pus haut jutchi. Y'a d's expèrts tchi dithent qué nou-fait, Caesarea, ch'est eune mêprînse dans un dotchument pouor "Caesea" - lé vèrt. Ch'est bein seux qu'lé nom d'Dgèrnésy veurt dithe lé vèrt ou la vèrte île, et nou peut craithe, s'nou veurt, qué Césarée, ch'tait Dgèrnésy.
Jules César fut stabbé y'a bein longtemps et nou n'peut pon lî d'mander la véthité. Mais s'i' fait bé ès mais d'Juîn et Juilet, i' n'faut pon laîssi la tchestchion nos faithe jadgîn.
Geraint Jennings
Viyiz étout: