Ch'n'est pas d'engnièt, i faut té l'diz',
Qué jé m'sis dit - i faut t'êcriz'
Un p'tit bétchèt
Sus chu sujèt.
Enfin, m'y v'là, du coup, j'l'espèz',
Un miot en trains ;
Pourvé occouo qu' j'n'en sais pon d'pièz' -
Ch'est chain qué j'crains . . . .

Hèlas ! man doux ! faut-i don m'tèz' ? . . . .
V'là qué l'gi m'prend . . . . Tchêqu' j'm'en vais fèz ? . . . .
J'pense à chu sé,
Quand chêqu' Néné
Criyait souotr' tai - èt chlà sans riz' :
"Ouêqu'tu t'en vas ?"
Dans t'n'embaras, tu sus li diz' :
"Jé n'lé sai pas !" . . . .

Ach't-heu, j'ézais bain l'tchoeu d'plieuzé,
Si, pardingu' ! j'en pouvais 'rpazé . . . .
I m'sembl' té vès,
Au pid d'l'hus, tchais . . . .
Quand tu fus, au "couôsin" Jean, fèz'
Eun' p'tit visit'.
Tu avais, l'Anmin Flip, bain afèz'
D'alé si vit' . . . .

Ch'n'est pas qu'j'n'ézais aimè plieuzé,
Si j't'avais veu, jé t'l'avouôzé, -
Mais j'crais qu'lé gi
M'ézait gangni . . . .
Dé-vrai, tout-d'mêm', j'n'ézais seu qu'fèz',
Si j'avais ouis
T'n-ézèqu' dé dos cratchi, - à brèz',
Jé m's'rais pièchi !

Enfin, tu laîsi lé ma drièz'
Et tu-entris tout drèt à t'asièz'
Là, au chagrin
Dé not' "couôsin"
Tu compatis, coum' tu sai l'fèz, -
Pis, coum' deux pans,
V'là qu'ou vos engroutît'nt à brèz
Dé tout's vos dents ! . . . .

"Eun' garc' dé fille" - i faut lé diz'
Tu-aperchus "dans un coin à riz'";
'Taich' dé l'audac' !
Pour eun' laide garc'.?
Mais coumêch' qu'ou pouvait sé tèz'?
Eche êtonnant ?
J'en èzais ris jusqu'à en brèz'
Jeanmais autant ! . . . .

Dé vès deux vièrs pions à brèz',
Coum' l'"couôsin" Jean èt tai pût'nt fèz',
Ch'tait d'tchai charmant !
Bain êdifiant ! . . . .
- Ah ! tu n'sais dguèz' l'pliaisi qu'j'ézais
Si chêqu' j'viyais
Chut' scèn' bain peinte, èt qué j'l'ézais
Pendue sus m'n-ais !

J(é).D('sire).R(ize).
St.-Heyé, chu 20 Mars 1868.