J'fus née à Pomona Road à St. Hélyi dans l'mais d'Janvyi 1938. J'gângnis neuf mais quand la dgèrre c'menchit. Ou finnit dans ma septième année, don mes mémouaithes né suivent exactément. Dévant qu'les Allemands arrivîssent, ma soeu fut née étout.
Ma méthe, ma soeu et mé, jé d'meuthêmes à Mill House tch'est à bas du “Old Trinity Hill”. Jé d'meuthêmes auve la propriêtaithe, eune femme qué j'app'lêmes Granny Crenan.
Dé bouonne heuthe les matîns, ma méthe allait en Ville pouor acater d'la nouôrrituthe.
Ou d'mandait à Granny d'souongni l's êfants (ma soeu et mé). Ch'est eune tâche que Granny n'aimait pon du tout. Parfais oulle oubliait not' existence. Un matîn jé m'ramémouaithe qué ma méthe rentrait au but d'la rue, et né v'là ma soeu et mé sus l'haut d'la tithette tchi 'tait d'vant la grand' fénêtre dé not' chambre.
Vite! Oulle entrit dans la maîson, ou mînt ses pouques au but des d'grès et ou couothit à la chambre et nos abbattit hors dé la tithette.
Bein seux, ou pensait chein qué j'pense achteu. S'ou n'eût pon rentré à chu temps-là, ma soeu et mé, j'éthaîmes tchée d'la f'nêtre et j'n'éthais pon peu êcrithe ch't' histouaithe achteu!
Shirley Pirouet
Viyiz étout: